Sybailas jemqorlyqqa qarsy is-qimyl agenttigi 2017 jyldan beri jemqorlyq faktileri 10,6% tómendegenin málim etti.
Bul týraly quzyrly organnyń 2020 jyly atqarylǵan ister týraly ulttyq baiandamasynda aitylǵan.
«Júieli aldyn alý jumysynyń nátijesinde, quqyq qorǵaý organdary tirkegen sybailas jemqorlyq faktileriniń sany 2,4%, 2017 jylmen salystyrǵanda – 10,6% tómendedi.
Jemqorlyq qylmystary tirkelgen vedomstvolar:
- Sybailas jemqorlyqqa qarsy qyzmette: 2019 jyly - 1717 fakti, 2020 jyly - 1632 fakti, dinamika -5%;
- Ishki ister ministrliginde: 2019 jyly – 269, 2020 jyly – 342, dinamika +27%;
- Ulttyq qaýipsizdik komitetinde: 2019 jyly – 128, 2020 jyly – 89, dinamika -30%;
- Prokýratýra organdarynda: 2019 jyly – 65, 2020 jyly – 78, dinamika +20%.
- Ekonomikalyq tergeý qyzmetinde: 2019 – 21, 2020 jyly – 21, dinamika 0%.
Eń kóp taralǵan sybailas jemqorlyq qylmystar:
- Para alý: 2019 jyly – 649 fakti, 2020 jyly– 568, dinamika -12,5%;
- Para berý: 2019 jyly – 440, 2020 jyly – 624, dinamika +41,8%;
- Alaiaqtyq: 2019 jyly – 327, 2020 jyly – 316, dinamika -3,3%
- Senip tapsyrylǵan bóten múlikti iemdenip alý nemese ysyrap etý: 2019 jyly – 243, 2020 jyly – 268, dinamika +10,3%:
- Laýazymdyq ókilettikterin teris paidalaný: 2019 jyly – 283; 2020 jyly – 193, dinamika -31,8%
Málim etilgendei, byltyr sybailas jemqorlyq qylmysy úshin 1021 adam sottaldy.
«2020 jyly sybailas jemqorlyq qylmys jasaǵany úshin 1021 adam sottaldy. Sonyń ishinde Sybailas jemqorlyqqa qarsy qyzmet tirkegen faktiler boiynsha 722 adam jaza arqalady. Olardyń arasynda 144 basshy (1 oblys ákimi, 4 oblys ákimderiniń orynbasary, ministrliktiń 2 jaýapty hatshysy, 2 komitet tóraǵasy, 1 elshi, 5 sýdia, 10 aýdandyq jáne qalalyq ákim) bar», - dep jazylǵan ulttyq baiandamada.
Qujattaǵy derekterge súiensek, sybailas jemqorlyqpen kúres kezinde 25 asa aýyr jáne 1368 aýyr qylmystyń, 112 júieli sybailas jemqorlyq faktileriniń joly kesilgen.
«Agenttik jemqorlyq árekettiń saldarynan kelgen 60,1 mlrd teńge zalaldyń 50,7 mlrd teńgesin óndirdi. Bul 2019 jyldyń kórsetkishinen eki ese joǵary (22,7 mlrd. teńge). Para alý jáne jymqyrý faktileri boiynsha eselik aiyppul somasy 2,8 mlrd teńgeni qurady. Keltirilgen zalaldy qamtamasyz etý úshin, kúdiktilerdiń múlkine 1,2 mlrd teńge somasynda tyiym salyndy», - delingen baiandamada.
