Qazaqstan Ulttyq banki 2021 jylǵy birinshi jartyjyldyqtyń qorytyndysy boiynsha eseptik tólem balansyn qalyptastyrdy. Aǵymdaǵy shottyń tapshylyǵy 2021 jylǵy tamyzda jariialanǵan aldyn ala baǵalaýmen salystyrǵanda 757 mln AQSh dollaryna ulǵaiyp, 2,4 mlrd AQSh dollaryn qurady, dep habarlaidy QazAqparat.
«Aldyn ala baǵalaý men qorytyndy derekter arasyndaǵy aiyrmashylyq, eń aldymen, 2021 jyldyń ekinshi toqsanyndaǵy tólem balansy boiynsha kásiporyndardyń túpkilikti esepterin alýǵa bailanysty. Sheteldik tikelei investorlardyń kirisi aldyn ala baǵalaýmen salystyrǵanda 893 mln AQSh dollaryna ósken kirister balansynda eń úlken ózgeris boldy. Aldyn ala baǵalaýdy jariialaý kezinde qalyptasqan kórsetkishter 2021 jyldyń ekinshi toqsanynda sheteldik investorlar kirisiniń ósýin baǵalamady», - delingen UB málimetinde.
Taratylǵan málimetke qaraǵanda, sheteldik investorlar kirisiniń ósýi negizgi quramdastar – dividendter boiynsha jáne qaita investitsiialanǵan paida boiynsha baiqalady. Mundai kiristerdiń basym bóligi munai-gaz, ózge de taý-ken óndirý, qarjy sektorlaryna tiesili.
«Saýda balansy boiynsha aldyn ala baǵalaýǵa qatysty ózgerister shamaly jáne ýákiletti organdardyń saýda men respondentterdiń esebin jańartýǵa bailanysty», - dep atalyp ótken habarlamada.
