Qazaqstan Respýblikasynyń syrtqy boryshy 2018 jylǵy 1 qańtardaǵy jaǵdai boiynsha 168 mlrd AQSh dollaryn qurady. Bul týraly Parlament Senatynda tilshilerge Ulttyq bank tóraǵasy Daniiar Aqyshev málim etti, dep habarlaidy QazAqparat tilshisi.
Onyń atap ótýinshe, syrtqy boryshtyń 62 paiyzy firmaaralyq bereshekke tiesili. Ol negizinen Qazaqstannyń aýmaǵynda munai-gaz jobalaryn iske asyratyn sheteldik kompaniialar filialdarynyń qaryzynan turady.
«Memlekettik sektordyń syrtqy boryshy 8 paiyzdy, memleket baqylaityn uiymdardyń úlesi - 16 paiyzdy, jeke sektordyń boryshy 14 paiyzdy quraidy», - dep túsindirdi D. Aqyshev.
UB basshysy sońǵy 3 jylda Qazaqstannyń syrtqy boryshy memlekettiń jáne onyń baqylaýyndaǵy uiymdardyń syrtqy boryshynyń, sondai-aq topishilik qarjylandyrýdyń esebinen 10 mlrd AQSh dollaryna nemese 6% ulǵaiǵanyn aityp berdi.
«Jeke qarjy sektorynyń syrtqy mindettemeleri 4 mlrd AQSh dollaryna nemese 56 paiyzǵa qysqardy», - dep atap ótti D. Aqyshev.
D. Aqyshevtiń sózine qaraǵanda, qazirgi ýaqytta Úkimet memlekettik jáne kvazimemlekettik qaryz alýdy baqylaý kúsheitilip jatyr. Ulttyq bank óz kezeginde qarjy uiymdarynyń syrtqy boryshyn retteý jumysyn jalǵastyrady.
