Búgin Úkimet otyrysynda biylǵy jeti aidaǵy áleýmettik-ekonomikalyq damýdy talqylaý kezinde Ulttyq bank tóraǵasy Erbolat Dosaev infliatsiiaǵa qatysty túsinik berdi, dep habarlaidy QazAqparat.
«Qazaqstandaǵy infliatsiia biylǵy jylǵy maýsymda 7,9%-ke deiin kúrt kóterilgennen keiin ósýdi jalǵastyryp, shildede 2017 jyldan beri eń joǵary mán – 8,4%-ke jetti. Azyq-túlik naryqtarynda teńgerimsizdikterdiń jii oryn alýy, shikizatqa álemdik baǵanyń ósýdi jalǵastyrýy jáne negizgi saýda seriktester bolyp sanalatyn elderde, ásirese Reseide infliatsiialyq turǵyda joǵary bolýy aiasynda infliatsiianyń jedeldeýi ornyqty sipatqa ie bolýda», - dedi Dosaev.
Onyń aitýynsha, kókónisterdiń jekelegen túrleri baǵasynyń jazǵy ailarǵa tán emes kúrt qymbattaýy nátijesinde biylǵy shildede 10,6 paiyzdan 11,0 paiyzǵa deiin ulǵaiǵan azyq-túlik infliatsiiasy jyldyq baǵanyń ósýine burynǵysynsha kóp úles qosty. Et pen ósimdik maiynyń qymbattaýy da qosymsha qysym kórsetýdi jalǵastyrýda.
«Azyq-túlikke jatpaityn infliatsiia uzaq ýaqyt paidalanylatyn taýarlar jáne janar-jaǵarmai baǵasynyń ósý qarqynynyń jedeldeýine bailanysty 6,9%-dan 7,2%-ǵa deiin ósti. Aqyly qyzmetter infliatsiiasy kommýnaldyq qyzmetterge tarifterdiń ósýi jáne jekelegen naryqtyq qyzmetterdiń qymbattaýy aiasynda 5,6 paiyzdan 6,1 paiyzǵa deiin jedeldedi. Azyq-túlik, janar-jaǵar mai baǵalarynyń aitarlyqtai ósýin, elektr energiiasy baǵasynyń kóterilýin, fiskaldyq yntalandyrýdyń barynsha kúsheiýin eskere otyryp, Ulttyq banktiń aldynala baǵalaýy boiynsha infliatsiia 2021 jyldyń sońyna taman 6-7% dálizinde kútiledi. Biylǵy jylǵy tamyz-qyrkúiekke josparlanǵan aldaǵy boljamdy raýnd aiasynda jańartylǵan boljamdar beriletin bolady. Infliatsiialyq protsesterdiń aitarlyqtai jedeldeýi jaǵdaiynda, júrgizilip otyrǵan aqsha-kredit saiasaty sheńberinde baǵa turaqtylyǵyn qamtamasyz etý úshin Ulttyq bank biylǵy 26 shildede bazalyq stavkany 9,25 paiyzǵa deiin 25 bazistik tarmaqqa arttyrý týraly sheshim qabyldady», - dep tolyqtyrdy UB basshysy.
