Ulttyq banktiń Monetarlyq operatsiialar departamentiniń direktory Nurjan Tursynhanov ulttyq valiýtanyń keri quldyraýyna qandai faktorlardyń áser etkeni týraly aitty, dep habarlaidy "Ult aqparat".
Onyń aitýynsha, birjadaǵy saýda-sattyqta teńgeniń AQSh dollaryna shaqqandaǵy baǵamy jeksenbiden beri (–)0,98% álsirep, 421,25 teńge shamasynda tur. Ulybritaniiada koronavirýstyń jańa túri paida boldy degen jańalyqtyń saldary bar, odan qaldy, osy oqiǵaǵa bailanysty saparlar men qozǵalystar shektelgen soń munai baǵasy quldyrap, damýshy elderdegi negizgi valiýtalardyń álsiregeni – Qazaqstan ulttyq valiýtasynyń álsireýine de yqpal etti.
«Energiia tasymaldaýshy naryqtarǵa áser etken qosymsha jaǵymsyz faktordyń biri – investorlardyń tómendeidi degen boljamyna qaramastan, AQSh-taǵy shiki munai qorynyń óskeni týraly málimet boldy. Sonyń saldarynan Brent markaly munai ótken aptanyń sońynan beri 5,7% arzandap, búgingi saýda-sattyqtyń aziialyq sessiiasynda barreline $49,26 satyldy»,– deidi Nurjan Tursynhanov.
Shiki munai qory týraly statistika boiynsha, naqty tutyný kólemi kútilgen mánderge jetpeidi, boljanǵan mánder OPEK+ elderiniń munaidy az óndirý merzimin uzartý týraly sheshiminiń nátijesinde energiia tasymaldaýshy naryqtarda optimizm týdyrdy.
«COVID-19 virýsynyń jańa shtammy tabyldy degen jańalyqqa bailanysty álemdik indeksterge de túzetýler endi. Eýropalyq dári-dármek agenttiginiń tarapynan Eýroodaq elderiniń aýmaǵyna COVID-19-ǵa qarsy vaktsinany paidalanýǵa ruqsa berý týraly jedel sheshim qabyldanǵanyna qaramastan, eýropalyq indekster de 1,7–2,5% tómendedi. AQSh-tyń qazirgi prezidenti D.Tramp qoldaýdy arttyrý baǵytynda túzetýler engizýge qatysty usynystar qoldaý tappaǵanyn alǵa tartyp, Kongress maquldaǵan yntalandyrý paketine qol qoiýdan bas tartqannan keiin AQSh birjalary ártúrli baǵyttarda jabyldy. Máselen, NASDAQ rekordty ósim kórsetse, Dow Jones pen S&P 500 indeksteri yntalandyrý paketine qatysty naqty sheshim bolmaǵan soń, minýspen jabyldy, bul óz kezeginde ósim úshin qosymsha táýekelder týdyrdy»,– deidi spiker.
Shikizat naryqtarynyń quldyraýyna bailanysty, damýshy naryqtardyń valiýtalary ótken aptanyń aiaǵynan bastap tómendep, seisenbide jalpy teris mándermen jabyldy. Dollarǵa shaqqanda Braziliia realy (–)1,6%, Meksika pesosy (–)1,0%, Ońtústik Afrikanyń rand baǵamy (–)0,9%, Úndistannyń rýpiiasy (–)0,7%, Túrik lirasy (–)0,5%, Úndi rýpiiasy (–)0,4% álsiredi.
«Vaktsinatsiia bastaldy degen jańalyqtyń áserinen qarashadan bastap aitarlyqtai nyǵaiǵan Resei rýbli de álsirep, juma kúngi (–)3,3% deńgeiinen búgin bir dollar úshin 76 rýblge deiin arzandady.Teńgeniń aiyrbastaý kýrsy syrtqy negizgi faktorlardyń yqpalymen qalyptasyp, energiia tasymaldaityn negizgi naryqtar men damýshy elderdiń naryqtaryna tán dinamika kórsetip otyr»,– dep qortyndylady Ulttyq bank ókili.
