Ulttyq banktiń monetarlyq operatsiialar departamentiniń direktory Nurjan Tursynhanov valiýta naryǵyndaǵy qazirgi jaǵdai týraly túsindirdi, dep habarlaidy QazAqparat.
Onyń paiymynsha, damyǵan jáne damýshy elderdiń valiýtalary infliatsiia men geosaiasi turaqsyzdyqqa qarsy kúres aiasynda qysymǵa ushyrap otyr. Ulttyq valiýta da ornyǵyp qalǵan ishki faktorlarǵa bailanysty jáne syrtqy ózgeristerdiń áserinen qubylmaly kúi keshýde.
«Dollardyń resmi baǵamy ai basynan beri 12,16 teńgege nemese 2,6%-ǵa álsirep, 8 shildede 477,24 teńgeni qurady. Bul oraida, AQSh dollarynyń jahandyq nyǵaiýy, energiia tasymaldaýshylar baǵasynyń tómendeýi, sondai-aq Qazaqstandaǵy Kaspii qubyry jelisi konsortsiýmynyń teńiz terminaly qyzmetin toqtata turý táýekelderi, sol sebepten naryqqa qatysýshylar sentimentiniń nasharlaýy, qazaqstandyq kompaniialardyń importtyq operatsiialary teńge dinamikasyna áser etken negizgi faktorlar boldy. AQSh qazynashylyq obligatsiialary kiristiliginiń ósýi men AQSh dollarynyń nyǵaiýy damyǵan, sol siiaqty damýshy elderdiń valiýtalaryna qysym jasady», - dedi ol.
Nurjan Tursynhanovtyń málimetinshe, DXY indeksi 7 shildede 107,13 deńgeiine deiin, iaǵni 2,3%-ǵa ósti, al JPMorgan damýshy elderi valiýtalarynyń indeksi 3,3%-ǵa álsiredi. Eýronyń AQSh dollaryna qatysty 1,016 deńgeiine deiin álsireýi shamamen tepe-teńdikke jetip, eleýli jaǵdai oryn aldy.
«7 shildedegi jaǵdai boiynsha, Brent markaly munai baǵasy ai basynan beri 8,8%-ǵa tómendep, barreline 104,65 AQSh dollaryn qurady. Máskeý birjasyndaǵy Resei rýbliniń baǵamy ai basynan beri 20%-ǵa álsirep, 61,95 deńgeiinde qalyptasty. Ishki faktorlar arasynda importtyq operatsiialardy júzege asyrý úshin valiýtaǵa saqtalyp otyrǵan suranys, syrtqy boryshtardy óteý, sondai-aq jeke tulǵalar tarapynan shetel valiýtasyna turaqty suranys teńge dinamikasynyń negizin qalady», - dedi Ulttyq bank ókili.
Jalpy alǵanda, energiia tasymaldaýshylar baǵasynyń tómendeýine bailanysty naryqqa qatysýshylar sentimentiniń nasharlaýy baiqalady.
Erkin ózgermeli baǵam jaǵdaiynda teńge úshin qubylmalylyqtyń oryn alýy – naryqtaǵy qalypty jaǵdai.
Mamannyń aitýynsha, ai basynan beri Ulttyq bank valiýtalyq interventsiialar júrgizgen joq. Bul rette qarjylyq turaqtylyqqa tónetin qaýipti boldyrmaý úshin vedomtsvo shamadan tys baǵam qubylmalyǵy kezinde valiýta saýda-sattyǵyna aralasý quqyǵyn ózine qaldyrady.
«Qysqa merzimdi perspektivada teńge dinamikasy importtyq operatsiialar men demalys maýsymy aiasynda qatysýshylar tarapynan shetel valiýtasyna suranystyń artýyna bailanysty bolady. Kórshiles óńirlerdegi geosaiasi ahýal, sondai-aq álemdik naryqtardaǵy jaǵdailar damýshy elderdiń valiýtalaryna qatysty investorlardyń jalpy sentimentine yqpalyn saqtaidy», - dedi Nurjan Tursynhanov.
Ulttyq bank teńgerimsizdikterdiń jinaqtalýyn boldyrmaityn jáne altyn-valiýta rezervteriniń saqtalýyn qamtamasyz etetin ikemdi baǵam belgileý rejimin ustanýdy jalǵastyra beredi.
