Ulttyq banktiń aqsha-kredit saiasaty departamentiniń direktory Jandos Shaimardanov kásipkerlik belsendilik indeksiniń jai-kúii týraly túsinikteme berdi, dep habarlaidy QazAqparat.
Aǵymdaǵy jyly álemniń kóptegen elderiniń ekonomikasyna koronavirýstyq infektsiianyń (COVID-19) taralýyna bailanysty faktorlar áser etti. Búkil álemde, onyń ishinde Qazaqstanda úkimetter qabyldaǵan shekteý sharalary, sondai-aq olardyń saldary ekonomikalyq belsendiliktiń aitarlyqtai tómendeýine ákeldi. Buǵan naqty sektordaǵy kásiporyndardyń aitarlyqtai nasharlaýy da dálel bolyp otyr.
«Ulttyq bank júrgizgen saýalnama qorytyndysyna sáikes, respondent kásiporyndardyń kópshiligi iskerlik belsendiliktiń edáýir nasharlaýy 2020 jylǵy sáýirde bolǵanyn kórsetedi. Osylaisha, iskerlik belsendilik indeksi 2016 jylǵy qyrkúiekten bastap alǵash ret 37,2-ge deiin tómendedi. Indekstiń quramdas bólikteri boiynsha da rekordtyq tómendeý baiqaldy: qyzmet kórsetý salasyndaǵy indeks 34,8, qurylysta – 36,5, ónerkásipte – 42,1 qurady. Kúrt tómendeý 2020 jylǵy 16 naýryzdan bastap elde tótenshe jaǵdai rejiminiń jáne 2020 jylǵy 19 naýryzdan bastap Nur-Sultan jáne Almaty qalalarynda karantin engizilýine bailanysty boldy»,–dedi Jandos Shaimardanov.
Onyń aitýynsha, karantinge túsken qalalar men oblystardyń tizimi virýs juqtyrý jaǵdailarynyń anyqtalýyna qarai keńeiip otyrdy, bul naqty sektordyń kóptegen sýbektileriniń qyzmetin toqtatty.
«2020 jylǵy mamyr-maýsymda karantin rejimi báseńdegen saiyn ekonomikalyq protsesterdiń jandanýy baiqaldy. Osylaisha, kásiporyndardyń baǵalaýy boiynsha, iskerlik belsendilik indeksi 2020 jylǵy sáýirdegi eń tómen quldyraýynan keiin maýsymda 46,8 deiin qalpyna keldi. Eldegi epidemiologiialyq jaǵdaidyń nasharlaýyna bailanysty karantin rejimi 2020 jylǵy shildede qaita engizilip, 17 tamyzǵa deiin uzartyldy. Bul naqty sektor kásiporyndarynyń iskerlik belsendilik indeksiniń shildede 44,7-ge deiin qaita tómendeýine jáne tamyzda 45,4-ke deiin azdap ósýine ákeldi», – dedi spiker.
Karantin sharalaryn kúsheitý qyzmet kórsetý salasy men ónerkásipke barynsha teris áser etti.
«Iskerlik belsendilik indeksi shildede (44,7) tómendegennen keiin tamyzda 45,4-ke deiin ósti. Naqty sektorda ekonomikanyń qalpyna kelýi qyzmet kórsetý salasyndaǵy kórsetkishtiń ulǵaiýy esebinen boldy, onda indeks 43,1-den 44,2-ge deiin kóterildi. Ónerkásipte 0,3 tarmaqqa 48,3-ke deiin ulǵaiý baiqalady. Bul jańa tapsyrystardyń shamaly ósýine bailanysty»,– dedi Ulttyq banktiń aqsha-kredit saiasaty departamentiniń direktory Jandos Shaimardanov.
Tamyzda biznes-klimat indeksi 4,2 tarmaqqa jaqsardy jáne (-) 3,0 mánine jetti, alaida áli de teris aimaqta tur. Sonymen qatar, respondentter qyrkúiekte biznes júrgizý jaǵdaiy jaqsarady dep kútýde.
Iskerlik belsendilik indeksi kásiporyndarǵa olardyń aǵymdaǵy kórsetkishteri men bolashaqtaǵy kútiletin ózgeristeri boiynsha júrgizilgen saýalnama negizinde qalyptasady. Tamyzda saýalnamaǵa 447 kásiporyn qatysty.
