Búgin Úkimet otyrysynda Ulttyq bank tóraǵasy Erbolat Dosaev Qazaqstanda infliatsiiany tómendetý qadamdaryn túsindirdi, dep habarlaidy QazAqparat.
«Memleket basshysynyń infliatsiiany 2022 jyly 4-6% nysanaly dálizge qaitarý jónindegi tapsyrmasyn oryndaý maqsatynda Ulttyq bank, birinshi kezekte, infliatsiiaǵa qarsy den qoiý sharalarynyń kesheni aiasynda monetarlyq emes faktorlardy turaqtandyrýǵa baǵyttalǵan sharalardy qabyldaýdy qoldaidy. Biylǵy 8 aidyń qorytyndysy boiynsha 11,4% deńgeiine jetken azyq-túlik baǵasynyń ósýi infliatsiiany jedeldetýge negizgi úles qosty. Ony osy jyldyń sońyna qarai 8%-ke deiin tómendetý úshin Sharalar keshenine sáikes, Úkimet pen ákimder retteýshilik sipattaǵy jáne monopoliiaǵa qarsy yqpal etýdiń tiimdi ýaqytsha qadamdaryn negizge ala otyryp, jekelegen naryqtardaǵy maýsymdyq kútpegen ózgerister men teńgerimsizdikterdi joiý boiynsha jedel sharalar qabyldaityn bolady», - dedi E. Dosaev.
Onyń aitýynsha, infliatsiiany turaqtandyrý boiynsha Memleket basshysy alǵa qoiǵan orta merzimdi maqsattarǵa qol jetkizý úshin Úkimet taýarlardyń óndirisi, eksporty men importy balansyn qatań saqtai otyryp, ishki naryqty jan-jaqty tolyqtyrý, agroónerkásiptik keshenniń ónimdiligin arttyrý jáne tiimdi taýar ótkizý júiesin damytý jónindegi bastamalardy iske asyratyn bolady. Bul azyq-túlik infliatsiiasyn 2022 jyly 6%-ke deiin jáne 2023-2024 jyldary 5%-ke deiin tómendetýge múmkindik beredi.
«Azyq-túlikke jatpaityn taýarlar boiynsha basqa taýarlar men qyzmetterge tikelei áser etýmen qatar aitarlyqtai janama yqpal etetin janar-jaǵarmai naryǵy baǵanyń ósýin tejeýdiń negizgi áleýetine jatady. Qazaqstan Respýblikasynyń Úkimetimen kelisim boiynsha biz azyq-túlikke jatpaityn infliatsiianyń 2022 jyly 5%-ke deiin jáne 2023-2024 jyldary 4%-ke deiin tómendeýin kútemiz», - dedi UB basshysy.
Onyń sózine qaraǵanda, retteletin qyzmetter úshin orta merzimdi negizde boljamdy jáne teńgerimdi tariftik saiasatty engizý aiyryqsha mańyzdy bolyp sanalady.
«2023 jyldan bastap baǵany ákimshilik retteýden halyqtyń áleýmettik osal toptaryna ataýly kómek kórsetýge aýysýdy bastaý oryndy dep esepteimiz. Bul servistik infliatsiiany 2022-2024 jyldary 4% deńgeiinde turaqtandyrýǵa múmkindik beredi. Usynylatyn sharalardyń tiimdiligi kóbinese óńirlerdegi jumystyń jumyla uiymdastyrylýy men úilestirilýine bailanysty bolady», - dedi E. Dosaev.
Budan buryn habarlanǵandai, búgin Úkimet otyrysynda elimizde baǵanyń ósýin tejeý maqsatynda 2021 - 2024 jyldarǵa arnalǵan infliatsiiaǵa qarsy áreket etý sharalary kesheniniń jobasy qaralyp, maquldandy.
