2021 jyldyń I toqsanynda kásiporyndarǵa júrgizilgen monitoring nátijeleri týraly QR Ulttyq banki Aqsha-kredit departamentiniń direktory Jandos Shaimardanov túsinik berdi, dep habarlaidy "Ult aqparat".
«Kásiporyndarǵa júrgizilgen monitoring nátijelerine súiensek, naqty sektorda ekonomikalyq belsendiliktiń qalpyna kele bastaǵanyn baiqaýǵa bolady. Oǵan daiyn ónimge degen suranystyń artýy, tabysty saýda, investitsiialyq belsendiliktiń birshama ósýi, sondai-aq aiyrbas baǵamynyń keri áseriniń tómendeýi túrtki boldy. 2021 jyldyń I toqsanynda naqty sektorda daiyn ónimge suranys aitarlyqtai óskenin kórdik, diffýziia indeksi (DI) 49,3-ten 55,4-ke deiin ósti. Qyzmet kórsetý salasynda indeks 53,8-ge, taýar óndirisinde 56,8-ge deiin kóterildi», - dedi ol.
Óndiris kólemi azaidy, DI 49,4-ten 40,5-ke deiin tómendedi. 2021 jyldyń II toqsanynda naqty sektordaǵy kásiporyndar óndiris kóleminiń maýsymdyq ulǵaiýyn kútip otyr (DI=54,8).
«Sonymen, 2020 jylǵy toqyraýdan keiin ekonomikalyq belsendiliktiń qalpyna kelýine bailanysty kásiporyndardyń daiyn ónimine jáne qyzmetine degen suranys ósip, óndiris kóleminen artyp otyr, bul óz kezeginde ónim baǵasynyń ósýine yqpal etýde (DI 56,4 qurady). 2021 jyldyń I toqsanynda suralǵan kásiporyndardyń 16,9%-y nesie alý úshin bankke júgindi, kásiporyndardyń 16,1%-y nesie aldy (nemese nesie alýǵa ótinim bergender sanynyń 95,3%-y). Kásiporyndardyń basym kópshiligi (81,7%) nesieni ainalymdaǵy aqshalaryn (materialdar, shikizat, jartylai fabrikattar jáne t.b. satyp alý) qarjylandyrýǵa tartty», - deidi maman.
2021 jyldyń I toqsanynda júrizilgen saýalnama kezinde kásiporyndardyń 33,9%-y Qazaqstan ekonomikasynyń búgingi ahýaly biznes júrgizýge kedergi bolǵanyn aitty. Biznes júrgizýdegi basqa da negizgi kedergilerdi atasaq, olar – naryqtyq básekelestik (29,7%), satyp alýshylardy izdeý (23,3%), salyq aýyrtpalyǵynyń deńgeii (23,2%), bilikti kadrlardyń jetispeýshiligi (17,2%).
Naqty sektordaǵy kásiporyndarda júrgizilgen saýalnamalardyń jiyntyq baǵasyn bildiretin kompozittik ozyńqy indikatordyń (KOI) serpini – naqty sektorda ekonomikalyq belsendiliktiń qalpyna kele bastaǵanyny kórsetedi, sóitip KOI 100,0-ge deiin kóterildi. 2021 jyldyń II toqsanynda ekonomikalyq belsendilik ósedi degen boljam bar (KOI ósý jaǵyna aýysyp, 100,4 qurady).
