Ulttyq banktiń Qarjylyq turaqtylyq jáne zertteýler departamenti direktorynyń orynbasary Oljas Kúbenbaev nesieleýge qatysty túsinikteme berdi, dep habarlaidy "Ult aqparat".
Banktiń habarlaýynsha, 2021 jyldyń I toqsanynda kredittik resýrstarǵa suranys pen usynystyń negizgi úrdisteri jaiynda bankter arasynda júrgizilgen saýalnama nátijeleri boiynsha kásiporyndardan alynǵan nesielerge suranys indeksiniń azdap óskeni baiqalady. Buǵan iri bankterdegi biznestiń iri jáne shaǵyn segmentterinde nesieleýge degen suranystyń edáýir ulǵaiǵany áser etti.
Ótken toqsandaǵydai, «Biznestiń jol kartasy-2025» memlekettik baǵdarlamasy aiasynda kásipkerlik sýbektileri tarapynan nesie qarajatyna degen qajettilik ótinimder sanynyń ósýine yqpal etti. Biznes ókilderine onlain qaryz berý qyzmetterin usynatyn bankterdiń sany aitarlyqtai ósti. Toqsan ishinde shaǵyn biznes boiynsha ótinimder sany 1,5 esege ósip, 120 myńdy qurady, al iri biznes segmentinde – 28%-ǵa artyp, 244-ke jetti.
Esepti toqsanda iri bizneske nesie berýge kelgende jekelegen bankterdiń yqylasy birshama ósti jáne maquldaý koeffitsienti 2020 jyldyń IV toqsanyndaǵy 70%-dan 2021 jyldyń I toqsanyndaǵy 55%-ǵa deiin tómendegenine qaramastan, 2020 jyldyń I toqsanynan joǵary deńgeide qalyp otyr.
Kelesi toqsanda bankter iri jáne orta biznes tarapynan suranys artady dep boljaidy, al shaǵyn biznes segmentinde jaǵdai kerisinshe. Esesine, bankterdiń kelesi toqsanda biznesti nesielendirý sharttaryn ózgertetin jospary joq.
Bul rette ipotekalyq jáne kepildendirilmegen nesiege degen suranys ta ósti, al avtonesiege, kerisinshe, azaiyp, kepildendirilgen tutynýshylyq nesiege degen suranys burynǵy qalpynda qaldy. Ipotekalyq nesiege degen suranys jyljymaityn múlik naryǵynyń belsendi damýymen jáne turǵyn úi satyp alý nemese jóndeý maqsatynda zeinetaqy jinaqtaryn alý múmkindigimen bailanysty artty. Alaida, maýsymdyq faktor suranystyń odan da kóbirek ósýin tejep tastady. Toqsan ishinde ótinimder sany 22%-ǵa azaiyp, shamamen 75 myńdy qurady.
Tutynýshylyq nesie túrleri boiynsha suranys qurylymynda jan-jaqty ózgerister baiqalady. Kepilsiz nesielerge de suranys ósti, ortasha chek 5%-ǵa artyp, 515 myń teńgeni qurady. Avtonesie alý boiynsha ótinimder sany 5%-ǵa, al ortasha chek 11,3%-ǵa azaidy. Bul rette kepilmen qamtamasyz etilgen tutynýshylyq nesieler boiynsha ótinimder sanynda eleýli ózgerister baiqalmaidy.
Esepti kezeńde bankterdiń ipotekalyq, kepildi jáne kepilsiz nesieler berýge daiyndyǵy burynǵy qalpynda qaldy, biraq avtonesie segmentinde birshama tómendedi. Bankter buryn berilgen qaryzdardan bosatylǵan qarajat esebinen avtonesieler berýdi jalǵastyra bastady jáne kelesi transhty «Qazaqstannyń Damý Banki» AQ jeńildetilgen baǵdarlamasy aiasynda aldaǵy toqsanda alýǵa nietti.
2021 jyldyń II toqsanynda bankter ipotekalyq jáne kepilsiz nesiege suranys óse beredi dep kútedi. Sonymen qatar, bankter avtonesie berý sharttaryn jeńildetýdi de josparlap otyr.
2021 jyldyń I toqsanynda nesieleý boiynsha bankter arasynda anketalyq tásilmen júrgizilgen saýalnamaǵa ekinshi deńgeidegi 23 bank qatysty, bul rette olardyń 10-ymen qosymsha suhbat júrgizildi.
Ulttyq Bank kredittik resýrstarǵa suranys pen usynystaǵy ózgeristerdi baǵalaý maqsatynda mundai saýalnamany toqsan saiyn júrgizedi.
