Osy jyldyń 10 maýsymynda 2006 jylǵy úlgidegi nominaly 500 teńgelik banknottar ainalymnan alynady, dep habarlaidy Ulttyq banktiń baspasóz qyzmeti.
Aita ketsek, 2006 jylǵy úlgidegi 500 teńgelik banknottardyń eki túri bar. Bireýinde Ulttyq bank tóraǵasynyń qoly qoiylǵan, ekinshisi - qoltańbasyz. Osy jyldyń 10 maýsymynda ekeýi de ainalymnan alynady.
Bul ýaqytqa deiin olar zańdy tólem quraly bolyp tabylady jáne tólemder men aqsha aýdarymdarynyń barlyq túri boiynsha Qazaqstannyń búkil aýmaǵynda qabyldanýǵa mindetti. Eski banknotty qabyldaýdan bas tartý faktileri týyndaǵan jaǵdaida, Ulttyq banktiń aýmaqtyq filialyna júginý qajet.
10 maýsymnan keiin 2006 jylǵy eski úlgidegi 500 teńgelik banknottardy bir jyl ishinde ekinshi deńgeili bankterde ótkizip, aiyrbastaýǵa bolady.
Bir jyl aiaqtalǵannan keiin, Ulttyq banktiń filialdary taǵy úsh jyl boiy eski banknottardy qabyldaidy, sondai-aq olardy jańa úlgidegi aqsha belgilerine aiyrbastaidy.
10 maýsymnan keiin tek 2017 jylǵy úlgidegi 500 teńgelik banknottar ainalymda qalady.
