UQShU bitimgershilik kúshteriniń Qazaqstandaǵy missiiasy tabysty aiaqtaldy. QR Syrtqy ister ministrliginiń Eýraziialyq integratsiia departamentiniń direktory Aleksandr Siniagovskii osyndai pikir bildirdi, dep habarlaidy QazAqparat.
«Qazirgi tańda UQShU-nyń Qazaqstan Respýblikasy bastamasymen elge kelgen bitimgershilik kúshter missiiasy jumysyn tabysty aiaqtady. 13 qańtardan bastap Qazaqstannyń resmi úndeýi negizinde jáne UQShU-nyń barlyq elderi qol qoiǵan qujatqa sáikes, UQShU-nyń birikken bitimgershilik kontingentin kezeń-kezeńimen shyǵarý bastaldy. Bizge kelgen bitimgerler missiiasyn sátti oryndap, óz elderine oraldy. UQShU ujymdyq kúshteri Ujymdyq qaýipsizdik týraly shartqa qol qoiylǵan kúnnen bastap 30 jyl ishinde alǵash ret jumyldyrylǵanyn atap ótken jón. Qańtar aiynyń basynda qarýly ekstremister, terrorister tarapynan qarsy agressiia aktisine tap bolǵan Qazaqstan UQShU-daǵy áriptesterinen qoldaý kórsetý týraly kómek surady», - dedi SIM ókili.
Aleksandr Siniagovskii bitimgershilik missiiany qysqa merzimge ákelýge uiymnyń 1992 jylǵy 15 mamyrdaǵy Ujymdyq qaýipsizdik týraly sharty men 2007 jylǵy 6 qazandaǵy bitimgershilik qyzmet týraly kelisimi, sondai-aq QaR Prezidentiniń tiisti úndeýi quqyqtyq negiz bolǵanyn eske saldy.
«Atap aitqanda, ujymdyq qaýipsizdik týraly sharttyń 4-babynda eger qatysýshy memleketterdiń biri agressiiaǵa ushyrasa, uiym ondai áreketti osy shartqa qatysýshy barlyq memleketterge agressiia retinde qarastyratyny anyq jazylǵan. Agressiia jasalǵan jaǵdaida barlyq basqa memleketter ótinish boiynsha dereý qajetti kómek, onyń ishinde áskeri kómek beredi», - dep tolyqtyrdy Aleksandr Siniagovskii.
