Ýkraina prezidenti Vladimir Zelenskii oligarhtardyń saiasi yqpalyn azaitýǵa baǵyttalǵan zańǵa qol qoidy. Qoǵam arasynda "oligarhtarmen kúres zańy" dep atalyp ketken qujatqa 5 qarashada qol qoiǵan Zelenskii zań yqpaly zor, shekteýli elita emes, qoǵam múddesin qorǵaidy dep atap ótti.
"Qandai iri kásipker bolmasyn, ózge kommertsiialyq uiymdar siiaqty zań aiasynda jumys isteýi tiis. Eger bireý zańdy ainalyp ótý úshin saiasatkerlerdi paidalanyp júrgen bolsa, tipti eń bai degen adamnyń ózi bul ádetimen qoshtasýyna týra keledi" dedi prezident.
Qyrkúiek aiynda parlamentten ótken zań jobasynda oligarh uǵymyna anyqtama beriledi. Oǵan sáikes, magnattardyń tizimi jasalyp, memlekettik organdar oligarhtar nemese olardyń ókilderimen bailanysyn ashyq kórsetýge mindetteledi. Qujat sonymen birge oligarhtardy saiasi partiialardy, saiasi jarnamalardy nemese sherýlerdi qarjylandyrýǵa tyiym salady, memleket aktivterin jekeshelendirý protsesinen alastatady.
AQSh jáne Eýroodaq uzaq ýaqyttan beri Ýkrainany halyq múddesine qaishy jumys istep kele jatqan oligarhtardyń áreketin tejeýge shaqyryp keledi. Alaida zań jobasyn synaýshylardyń pikirinshe, atalǵan qujat "jeke bastyń kegin alýǵa" jol ashady.
