Ýkraina qazaqstandyq stýdentter úshin 40 JOO grantyn bóldi, dep habarlaidy "Ult aqparat".
«Qazaqstan Respýblikasyndaǵy Ýkraina elshiligi 2019 jyly Ýkrainanyń memlekettik biýdjeti esebinen 40 grant bólingenin habarlaidy. Ol granttar Qazaqstan azamattaryn Ýkrainanyń joǵarǵy oqý oryndarynda tehnikalyq, ekonomikalyq jáne gýmanitarlyq mamandyqtar boiynsha oqytýǵa arnalǵan», - dep habarlandy Ýkrainanyń diplomatiialyq ókildiginen.
Aita keteiik, onyń ishinde 30 grant - «bakalavr», 10 oryn - «magistr» dárejesine bólingen. Úmitkerler qujatty Ýkrainanyń bilim jáne ǵylym ministrligine 2019 jyldyń naýryz aiyna deiin ótkizý kerek.
Ýkraina tarapy stipendianttardy tegin oqýmen, sondai-aq daiarlyq bólimshelerimen, jataqhanadaǵy tegin orynmen, Ýkrainanyń zańnamasyna sáikes meditsinalyq qyzmetpen qamtamasyz etedi. Akademiialyq shákirtaqy «bakalavr»/«magistr» dárejeleri boiynsha oqý barysynda tólenedi.
Tolyǵyraq aqparatty myna siltemeden bilýge bolady.
