Ýkraina zaýyt ashyp, barlaý jáne soqqy berý maqsatynda paidalanylatyn Bayraktar dronyn qurastyrady. Ýkrainanyń Túrkiiadaǵy elshisi Vasilii Bodnar Azattyqtyń Ýkraina qyzmetine bergen suhbatynda osylai dep málimdedi.
Onyń aitýynsha, ushqyshsyz basqarylatyn apparat turaǵy men olardy jóndeitin ortalyq salý úshin qazir jer telimin bólý máselesi qarastyrylyp jatyr. Oǵan qosa, Ýkrainada Bayraktar dronyn qurastyrý jumystary da qatar júrýde.
"Másele Ýkraina Qarýly kúshterine qajet jáne úshinshi elge de jetkiziletin ushqyshsyz apparatty nólden bastap qurastyrý jóninde bolyp otyr. Ózgelerdi qatelestirmes úshin naqty merzimin aita almaimyn, biraq jumys qyzý júrip jatyr, oǵan jyl emes, ailar ketetini anyq" dedi ol.
Vasilii Bodnardyń sózine qaraǵanda, ushqyshsyz apparatqa qazirdiń ózinde ózge elder, arasynda Qyrǵyzstan da bar, qyzyǵýshylyq tanytyp otyr. Túrkiianyń apparatty qurastyrý qýaty artyp tolǵan, sol sebepti Ankara qosymsha óndiris qýatyn qosyp, jańa naryq igerýge umtylady.
Ýkraina túrik tarabymen Bayraktar dronyn satyp alý jóninde kelisimge 2019 jyldyń basynda qol qoiǵan. Zymyran 12 men 24 saǵat aralyǵynda áýede qalyqtap tura alady. Radiýsy segiz shaqyrymdaǵy nysandarǵa joǵary dáldikpen bomba tastai alady.
Qazan sońynda Ýkraina armiiasy atalǵan drondy Granitnoe eldimekenindegi artilleriialyq nysanǵa soqqy berý úshin paidalanǵan. Kievtiń aitýynsha, ol jaqtan ýkrain pozitsiialaryna shabýyl jasalǵan.
Ýkrainanyń túrik drondaryn paidalanýyna Frantsiia men Germaniia alańdaýshylyq bildirgen. Germaniia SIM-niń aitýynsha, qaqtyǵys aimaǵynda tek EQYU drondary ǵana usha alady. Al Bayraktar aimaqta usha alatyn apparattar tizimine enbegen.
21 qazanda Qyrǵyzstan ulttyq qaýipsizdik jónindegi memlekettik komitetiniń tóraǵasy Qamshybek Táshiev Túrkiiadan Bayraktar dronyn satyp alǵysy keletinin aitqan. Biraq apparat sany men qunyna toqtalmaǵan.
