Foto: Aqordanyń baspasóz qyzmeti
Memleket basshysy Ulttyq qaýipsizdik komitetiniń tóraǵasy Ermek Saǵymbaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke vedomstvonyń 2023 jyly atqarǵan jumysynyń negizgi nátijeleri men aldaǵy kezeńge arnalǵan jospary týraly málimet berildi.
Qasym-Jomart Toqaevqa byltyr UQK bólimsheleri elimizde eki terrorlyq árekettiń jáne sheteldiń arnaýly qyzmetterimen birge ózge memleketterdiń aýmaǵynda úsh lańkestik aktsiianyń aldyn alǵany jóninde baiandaldy. Lańkestik jáne ekstremistik qylmystar jasaǵany úshin 43 adam sottaldy. Jyl boiy Ulttyq qaýipsizdik komitetiniń úilestirýimen terrorizmge qarsy 208 komandalyq-shtabtyq jáne 196 jedel-taktikalyq oqý-jattyǵý jiyny ótken.
Ermek Saǵymbaev ekonomikalyq qaýipsizdikti qamtamasyz etý jáne jii kezdesetin sybailas jemqorlyqqa qarsy kúres jumystarynyń nátijesi jóninde aitty. Qabyldanǵan sharalar nátijesinde jalpy 1,5 trillion teńgeden astam qarjy túsken, sonyń ishinde memlekettik biýdjetke qaitarý bastamasy aiasynda 680 milliard teńgeden asa qarjy qaitaryldy.
Sonymen qatar kezdesýde Ishki ister ministrligimen birlesip, uiymdasqan 15 qylmystyq top qyzmetiniń joly kesilgeni, sondai-aq 681 qarý men 85 myńnan astam oq-dári tárkilengeni týraly aityldy.
Esirtki biznesine qarsy is-qimyl boiynsha 36 zerthana joiyldy. 34 halyqaralyq jáne 32 óńirlik esirtki arnasyna tosqaýyl qoiylyp, 3,6 tonna esirtki tárkilendi.
UQK halyqaralyq yntymaqtastyq aiasynda sheteldik áriptesterimen birqatar operatsiiany júzege asyrdy.
Memlekettik shekarany kúzetý salasynda quqyq buzǵan 31 myńnan astam adam ustalǵan. Qarý-jaraq, oq-dári jáne esirtki alyp ótýge qatysty 739 áreketke, sondai-aq jalpy somasy 11,7 milliard teńge bolatyn valiýta men altyndy, somasy 12,6 milliard teńgeni quraityn taýardy tasymaldaýǵa jol berilmedi.
Ulttyq qaýipsizdik komitetiniń tehnikalyq bólimsheleri memlekettik organdardyń resýrstaryna jáne eldiń mańyzdy strategiialyq infraqurylym nysandaryna jasalǵan 86,3 million kibershabýyl men 2156 DDoS-shabýyldy toitarǵan.
Kezdesý sońynda Qasym-Jomart Toqaev Ulttyq qaýipsizdik organdary qyzmetiniń baǵyttary boiynsha birqatar naqty tapsyrma berdi.
