Foto: Aqordanyń baspasóz qyzmeti
Memleket basshysy Ulttyq qaýipsizdik komitetiniń tóraǵasy Ermek Saǵymbaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke vedomstvonyń biylǵy úshinshi toqsannyń basynan beri atqarǵan jumystarynyń negizgi nátijesi men buǵan deiin berilgen tapsyrmalarynyń oryndalý barysy jáne aldaǵy kezeńge arnalǵan jospary týraly málimet berildi.
Qasym-Jomart Toqaevqa Qazaqstan aýmaǵynda lańkestik áreket jasaýdy josparlaǵan radikaldy toptyń quryqtalǵany týraly baiandaldy. Terroristik qylmystar boiynsha 7 sotqa deiingi tergeý amaldary bastaldy jáne 3 ekstremist sottaldy.
Ermek Saǵymbaevtyń aitýynsha, terrorizmge qarsy is-qimyl sharalaryn jetildirý maqsatynda UQK Terrorizmge qarsy ortalyǵy 103 oqý-jattyǵý jiynyn uiymdastyrdy.
Sonymen qatar Memleket basshysyna kriminogendik ahýaldy jaqsartý jumystarynyń nátijeleri týraly baiandaldy. Atap aitqanda, qoǵamǵa qaýip tóndirgen 5 qylmystyq top áreketiniń joly kesildi. Zańsyz qarý ainalymyna qatysy bar 2 arna joiyldy. Ulttyq qaýipsizdik organdary politsiiamen birlesip, qarý jasyrylǵan 12 oryndy anyqtady. Jalpy sany 59 qarý, 3 granata jáne 3 339 oq-dári tárkilendi.
Esirtkige qarsy kúres barysynda 7 zerthana, 8 halyqaralyq jáne aimaqtyq esirtki tasymalynyń joly kesildi. 660 keliden astam esirtki jáne 17 tonnadan asa prekýrsor tárkilendi.
Budan bólek, memlekettik shekarany qorǵaý jáne zańsyz kóshi-qonmen kúres salasynda 4 257 quqyq buzýshy ustaldy. Quny 3,8 milliard teńgeden asatyn valiýta men taýarlardyń zańsyz tasymaldanýyna jol berilmedi. Sondai-aq qarý, oq-dári jáne esirtki alyp ótýge qatysty 120 áreketke tosqaýyl qoiyldy.
Aqparattyq qaýipsizdikti qamtamasyz etý barysynda elimizdiń asa mańyzdy infraqurylym nysandaryna jasalǵan 36 millionnan astam kibershabýyl men 866 DDoS-shabýyl toitaryldy.
Kezdesý sońynda Qasym-Jomart Toqaev ulttyq qaýipsizdik organdarynyń jumys baǵyttary boiynsha birqatar naqty tapsyrma berdi.
