QR Ulttyq qaýipsizdik komiteti tóraǵasynyń orynbasary Nurǵali Bilisbekov terakt jasamaq bolǵan kúdiktiler jaily aityp berdi.
Parlament Senaty Halyqaralyq qatynastar, qorǵanys jáne qaýipsizdik komitetiniń keńeitilgen otyrysynda senator Dariǵa Nazarbaeva UQK tóraǵasynyń orynbasarynan Qazaqstandaǵy terrorizm men ekstremizm qaýpiniń deńgeii qandai ekenin surady.
Bilisbekov Siriia, Irak pen Aýǵanstandaǵy qaqtyǵys aýmaqtaryndaǵy jaǵdaidy eskere otyryp, aimaqta belgili bir qaýip bar dep jaýap berdi.
«Árine, biz buny asa joǵary qaýip dep baǵalap otyrmyz. Ókinishke orai, biz halyqaralyq terroristik uiymdar múddeleriniń orbitasyndamyz. Bunyń dáleli - qańtar aiynyń basynda Almatyda toptyń ustalýy. Olarǵa Qazaqstan aýmaǵynda terakt jasa degen tapsyrma shetelden berilip otyrǵan. Maqsaty belgili – jaǵdaidy turaqsyzdandyrý, haos ornatý. Jáne de, aita ketetin basty nárse, olar áli de jumysyn jalǵastyryp jatyr», - dedi Bilisbekov.
UQK tóraǵasy orynbasarynyń aitýynsha, qaqtyǵys aimaqtarynda soǵysyp júrgender qataryna elimizdiń azamattary da bar. Olardyń júrgen jerleri, solarǵa qatysty protsester men Qazaqstanǵa yqpaly baqylaýǵa alynǵan. Qazir qaqtyǵys aimaqtarynda 300-den astam Qazaqstan azamaty qalyp otyr, olardyń 100-ge jýyǵy qolyna qarý alyp, soǵysyp júr.
Atap ótsek, jaqynda Qazaqstanda terakt jasamaq bolǵan sheteldik azamattar ustalǵan bolatyn. Ortalyq Aziia elderiniń azamattary Almatyda qolǵa túsken edi. Tintý barysynda olardyń ýaqytsha turǵan jerinen qýatty jarylǵysh zat jasaýǵa arnalǵan komponentter, qarý-jaraq pen oq-dáriler tabylǵan.
