Foto: ashyq derekkózderden
Májilis depýtaty Abzal Quspan Bas prokýratýraǵa Ulttyq qaýipsizdik komitetiniń burynǵy tóraǵasy Amangeldi Shabdarbaev pen «QazAtomÓnerkásip» kompaniiasynyń burynǵy basshysy Muhtar Jákishevtiń suhbattarynda aitylǵan málimetterdi tekserýdi usyndy, dep habarlaidy Kazinform agenttigi.
«Ulttyq qaýipsizdik komitetiniń burynǵy tóraǵasy A.Shabdarbaevtyń ózi birneshe ret ashyq suhbat berdi. Burynǵy tóraǵa, general-leitenant A.Shabdarbaevtyń sol kezdegi memleket basshylyǵy tarapynan ýran kenishteri kimge, qalai úlestirilgeni týraly suhbattarda naqty mysaldar bar. Ol kisi ártúrli saiasi familiialardy atap, kimniń qandai qylmysqa barǵanyn áshkereledi. Jer-qazba bailyqtaryna bailanysty, olardyń zańsyz úilestirilýine tikelei dálelmen Muhtar Jákishev, taǵy da basqa birqatar azamattyń ashyq suhbattary, málimdemeleri jariialanyp, onda iri kompaniialarǵa Qazaqstan halqyna tiesili bailyqtyń taratylýy, zańsyz berilý faktileri naqty aitylǵan. Soǵan qaramastan, quqyq qorǵaý organdary, prokýratýra tarapynan eshqandai reaktsiia baiqalmaidy. Birde bir másele kóterilmeidi», - delingen depýtattyq saýalda.
Zańgerdiń aitýynsha, Qylmystyq-protsesstik kodekstiń 180-baby osyndai suhbattarda aitylǵan derekter sotqa deiingi tergep-tekserýdi bastaýǵa múmkindik beretinin aitady.
«Joǵaryda attary atalǵan azamattardyń saiasi qyzmette bolǵanyn bilemiz, olardyń málimdemeleriniń negizi bar dep esepteýge bolady. Tipti olai bolmaǵan jaǵdaidyń ózinde, aqparat QPK 180-babynyń talaptaryna sáikes, tirkelip sotqa deiingi tergeý jumystary júrgizilip, onyń nátijesi halyqqa habarlanýy kerek dep bilemin. Sebebi, BAQ-ta jariialanǵan qylmys týraly aqparattardy STBT-ǵa tirkeý quqyq qorǵaý organdary úshin talqylaýdy qajet etpeitin, imperativti norma bolyp tabylady. Bas prokýratýra – zańdylyqtyń oryndalýyn qadaǵalaityn konstitýtsiialyq organ retinde, qoǵamda rezonans týdyratyn saiasi málimdemelerge der kezinde quqyqtyq baǵa berýi, dálelder men dáiekter jetkilikti bolǵan jaǵdaida qylmystyq istiń sotqa jetkizilýin qamtamasyz etýi qajet», - dedi Abzal Quspan.
