21 jeltoqsanda Ulttyq qaýipsizdik komitetiniń ókilderi elimizdiń aýmaǵyndaǵy "At-Takfir ýál-Hidjra" dini-ekstremistik uiymyn zalalsyzdandyrý maqsatynda arnaiy operatsiiany bastady, - dep habarlaidy "Ult aqparat" QR UQK baspasóz qyzmetine silteme jasap.
Jedel is-sharalar bir mezgilde Almaty, Aqtóbe, Atyraý oblystary men Almaty qalasynda júrgizilýde.
Dini alaýyzdyqty qozdyrý jáne tyiym salynǵan uiymdardyń is-áreketine qatysý boiynsha kúdikti bolǵan 16 adam ustalyp, UQK aýmaqtyq organdaryna jetkizildi.
Olardyń turǵan jerleri boiynsha tintý jáne basqa da jedel-tergeý, protsessýaldyq is-áreketteri júrgizilýde.
Bul uiymdardyń músheleriniń «senbeýshilik úshin aiyptaý» nemese «takfir» dep atalatyn ustanymdy nasihattaityny belgili, olar, óz kezeginde «Ál-Kaida», «DAISh» jáne basqa da birqatar terroristik uiymdardyń ideologiiasynda qurylǵan.
«At-Takfir ýal-Hidjra» jolyn ustanýshylar Siriia men Iraktaǵy terroristerdiń is-áreketterin qoldaidy, sondai-aq elimizdiń konstitýtsiialyq zańdary men zaiyrly basqarý túrin moiyndamaidy.
Atalǵan uiym 2014 jyly sot sheshimimen ekstremistik dep tanylyp, onyń áreketine Qazaqstan aýmaǵynda tyiym salynǵan. Ol AQSh, Resei, Qytai, Mysyr, Liviia, Marokko, Tájikstan, Ózbekstan jáne ózge de elderdiń terroristik uiymdar tizbesine qosylǵan.
Ulttyq qaýipsizdik komiteti operatsiia barysy jáne odan ári tergeý nátijesi týraly habarlaityn bolady.
Ult portaly
