Úkimet otyrysynda Pavlodar oblysynyń ákimi Ábilqaiyr Sqaqov Ekibastuz qalasyn damytýdyń keshendi josparynan kútiletin áleýmettik áserlerdi atady, dep habarlaidy QazAqparat.
«Ekibastuzdyń keshendi damýy – bul jańa óndirister ǵana emes. Joǵaryda atap ótkendei, áleýmettik salada birqatar mańyzdy máseleler bar. Olardy óńir qarajaty esebinen sheshý josparlanǵan.
Densaýlyq saqtaý salasy boiynsha kadrlyq áleýetti arttyrý jáne qalalyq emhanany jańǵyrtý arqyly materialdyq-tehnikalyq bazany jaqsartý josparda.
Bilim berý salasynda barlyq 20 mektepke kúrdeli jóndeý jasalyp, balabaqshalar qaita jańartylady. Sondai-aq, 700-den astam balany qamtityn shyǵarmashylyq ortalyqtyń qurylysy kútilýde», - dedi óńir basshysy.
Ákimniń sózinshe, keshendi jospardy júzege asyrýdan mynadai nátijeler kútilip otyr:
• negizgi kapitalǵa salynatyn investitsiialar 737 mlrd. teńgeni quraidy;
• ónerkásip óndirisiniń kólemi – 1 trln. teńgeden astam deńgeide;
• memlekettik qoldaý sharalary arqyly shaǵyn jáne orta biznes sýbektileriniń sany 10 myńǵa deiin jetedi;
• 16,5 myń jumys orny qurylady, onyń ishinde turaqty – 14 myń;
• orta ailyq eńbekaqy – 321 myń teńgege deiin ósedi;
• qala ekonomikasynyń otyn energetika keshenine táýeldiligin 12,1%-ǵa tómendetý
