8 qarashada QR Premer-Ministriniń orynbasary Berdibek Saparbaev bastaǵan Úkimettik jumys toby Pavlodar oblysyna baryp qaitty. Jumys tobynyń quramynda QR eńbek jáne halyqty áleýmettik qorǵaý ministri Birjan Nurymbetov, QR mádeniet jáne sport vitse-ministri Eldos Ramazanov, QR aqparat jáne qoǵamdyq damý vitse-ministri Marat Ázilhanov, QR bilim jáne ǵylym vitse-ministri Sholpan Karinova, QR densaýlyq saqtaý ministri Kamaljan Nadyrov boldy, dep habarlaidy "Ult aqparat" Úkimet basshysynyń resmi saityna silteme jasap.
Úkimettik jumys toby Pavlodar oblysynyń jurtshylyǵymen kezdesý ótkizdi. Óz sózinde Premer-Ministrdiń orynbasary Prezidenttiń Qazaqstan halqyna arnaǵan Joldaýynda alǵa qoiylǵan mindetterdi iske asyrý úshin Úkimet qandai sharalardy qabyldap jatqanyn aityp berdi.
«Biyl áleýmettik salaǵa 7,5 trln-nan astam teńge nemese respýblikalyq biýdjet shyǵystarynyń 45%-y baǵyttaldy. 2020 jylǵa arnalǵan biýdjet jobasynda áleýmettik sala shyǵystarynyń úlesi 47%-ǵa deiin artady. Búgingi tańda memleket óziniń áleýmettik mindettemelerin tolyǵymen oryndaýda. Máselen, osy jyldyń 10 aiynda 200 mlrd teńgeden astam somada ataýly áleýmettik kómek tólendi. 2,2 mln adam qamtyldy, onyń ishinde – 1,5 mln bala. Qarjylandyrý kólemi 9 esege ósti», — dedi B. Saparbaev.
Sondai-aq, Úkimettik jumys toby oblystyń pedagogtarymen jáne meditsina qyzmetkerlerimen kezdesýler ótkizdi, Aqsý aýdany Evgenevka aýylynyń turǵyndarymen kezdesti jáne birqatar áleýmettik nysandardy aralady.
Óńirdegi meditsina qyzmetkerlerimen ótken kezdesýde jalaqyny kóterý, mindetti meditsinalyq saqtandyrýdy engizý, meditsinalyq qyzmet sapasyn arttyrý, materialdyq-tehnikalyq bazany jaqsartý jáne taǵy basqa máseleler talqylandy.
Óńirde halyqtyń MÁMS engizý týraly aqparattanýynyń 52%-dan 85%-ǵa deiin joǵarylaǵany baiqalatyny atap ótildi.
Mindetti áleýmettik meditsinalyq saqtandyrý engizilgennen keiin densaýlyq saqtaý júiesin qarjylandyrý edáýir artady. Úsh jyl ishinde densaýlyq saqtaý júiesine jumsalatyn shyǵyndar kem degende bir jarym esege — 1,3 trln teńgeden 2,5-3 trln teńgege deiin artýy kerek.
Sondai-aq, dári-dármekpen qamtamasyz etýge jáne dári-dármekterdiń baǵasyn belgileýge nazar aýdaryldy. Búgingi tańda Qazaqstanda 7,8 myńǵa jýyq dári-dármek túrleri satylady jáne olardyń jartysynyń qunyn memleket retteidi.
Buǵan qosa, vitse-premer halyqty dári-dármekpen ýaqytyly qamtamasyz etýdiń mańyzdylyǵyna toqtaldy.
«Kelesi jyldyń basynda bizde dári-dármekpen qamtamasyz etýde eshqandai kidirister bolmaýy úshin, qarasha-jeltoqsan ailarynda kelesi jylǵa arnalǵan barlyq kelisimsharttardy jasaýymyz kerek», — dedi ol.
Oblys ortalyǵynda jumys tobynyń músheleri óńirlik jedel járdem stantsiiasynyń jumysymen tanysty. Pavlodarlyq 103 qyzmetiniń avtoparkinde 100-den astam arnaiy kólik bar. Barlyq mashinalar GPS sezbegimen jabdyqtalǵan, jedel járdem brigadalarynyń meditsinalyq qamtylýy «S» sanatynyń joǵary standarttaryna sáikes keledi. Bul, B. Saparbaevtyń aitýynsha, memlekettiń densaýlyq saqtaýdyń materialdyq-tehnikalyq bazasyn nyǵaitý boiynsha qabyldap jatqan sharalarynyń aiqyn dáleli.
Bilim berý júiesin damytý jáne pedagogtyń mártebesin arttyrý turǵysynan, keler jyldan bastap pedagogterdiń jalaqysynyń ortasha kólemin shamamen 30%-ǵa arttyrý josparlanǵany atap ótildi. Bul maqsatqa shamamen 200 mlrd teńge bólindi.
Daryndy jáne talantty balalarǵa jan-jaqty qoldaý kórsetiledi. Tuńǵysh Prezident – Elbasynyń qorymen birge jaqynda Aqtóbede bastaý alǵan «El úmiti» jobasy iske asyrylyp jatyr. Onyń maqsaty — 1000-nan astam daryndy balalardy iriktep alý, olardyń bilim alýyna jáne talantyn damytýǵa qoldaý kórsetý. Erekshe qajettilikteri bar balalardyń ata-analaryna da jaqyn arada eleýli qoldaý kórsetiledi. Kelesi jyldan bastap, QR Tuńǵysh Prezidenti – Elbasynyń bastamasy aiasynda elimizdiń óńirlerinde ońaltý ortalyqtary salyna bastaidy.
«Memleket óz azamattarynyń ál-aýqatyn jaqsartý turǵysynan aýqymdy jumystar atqaryp jatyr. Kelesi jyldan bastap biz kóp balaly jáne az qamtylǵan otbasylardy qoldaý baǵdarlamalaryna ózgerister engizemiz. Eger buǵan deiin áleýmettik kómek alýshylar ózderiniń naqty kiristerin jasyra alsa, onda 2020 jyldan bastap bundai faktiler múldem bolmaidy. Sonymen qatar, Úkimet muǵalimniń mártebesin arttyrdy jáne muǵalimderdiń jalaqysyn 2 esege ósirýdi josparlap otyr», — dedi vitse-premer.
QR Premer-Ministriniń orynbasary bastaǵan úkimettik jumys toby Aqsý qalasy men onyń aýyldyq aimaǵynda boldy.
Vitse-premer osy jyly memlekettik-jekemenshik áriptestik aiasynda qurylǵan múgedek balalarǵa arnalǵan «Ortoprot» ońaltý ortalyǵynda boldy. Ortalyqta bir jarym jastan 18 jasqa deiin tirek-qimyl apparaty buzylǵan balalarǵa qyzmet kórsetiledi. Ashylǵannan beri tirek-qimyl apparaty buzylǵan 15 balaǵa kómek kórsetildi. Sondai-aq, Evgenevka aýylyndaǵy dárigerlik ambýlatoriiaǵa da bardy.
Úkimet top jumys saparyn Evgenevka aýylynyń turǵyndarymen kezdesýmen aiaqtady. Berdibek Saparbaev Prezidenttiń «Cyndarly qoǵamdyq dialog – Qazaqstannyń turaqtylyǵy men órkendeýiniń negizi» Joldaýynda júktelgen mindetterdiń oryndalýy týraly aitty. Ol memleket muqtaj azamattardy áleýmettik qoldaý jumystaryn kúsheitetinin atap ótti.
