Úkimettik emes uiymdar-biznes-memleket seriktestiginiń «ASAR» III Respýblikalyq forýmy biyl Pavlodar qalasynda ótedi, dep habarlaidy QazAqparat.
ÚEU-biznes-memleket seriktestiginiń «ASAR» III respýblikalyq forýmy Pavlodar qalasynda 21-22 tamyzda ótedi.
Forým jergilikti qoǵamdastyqtyń áleýmettik máselelerdi sheshýde biznes, úkimettik emes sektor jáne memlekettik organdardyń kúsh-jigerin belsendi etýge baǵyttalǵan.
Forým «ár jyly – jańa óńir» qaǵidasy boiynsha ótýde, bul el deńgeiinde, sondai-aq, óńirlik kontekstti tolyǵymen zerdeleý maqsatynda úsh jaqty yntymaqtastyq qarqynyn kórsetýge múmkindik beredi. Alǵashqy «ASAR» forýmy 2017 jyly Atyraýda, ekinshi forým 2018 jyly Taldyqorǵanda ótkizilgen.
Forým jumysyna biznes-qurylym, otandyq jáne halyqaralyq ÚEU, sarapshylar qaýymdastyǵynyń, ortalyq jáne memlekettik organdar ókilderiniń qatysýy kútilýde.
Aqparat jáne qoǵamdyq damý ministrliginiń málimetinshe, forým jumysy 4 baǵytta: SOCIAL – ASAR «Biznestiń áleýmettik salany damytýǵa qatysýynyń tiimdi modelderi», ECO – ASAR «Jasyl» seriktestiń formatyndaǵy álem», IT – ASAR «Áleýmettik salanyń innovatsiialyq damýyndaǵy IT jobalardyń róli» jáne INCLUSIVE – ASAR «Inkliýzivtik qoǵam ýaqyty» ótkiziledi.
Eki kúndik forým sheńberinde «Áleýmettik innovatsiialar: óńirlik damý jetistiginiń formýlasy» taqyrybynda plenarlyq otyrys ótkiziledi.
Onyń aiasynda úsh jaqty áriptestikti jáne onyń tetikterin damytý, áleýmettik investitsiialar baǵyttarynyń paradigmasyndaǵy biznestiń qyzmeti, «kishi» otandy damytýǵa áleýmettik investitsiialar jáne t.b. máselelerdi talqylaý josparlanýda.
Sonymen qatar, sheberlik sabaqtary, case-study seminarlaryn, workshop-tar (praktikýmder), «#7 Spiker» intellektýaly konferentsiiasyn uiymdastyrý jáne memorandýmǵa qol qoiý josparlanǵan.
Sonymen birge, alǵash ret «ASAR activity» jobasyn uiymdastyrý josparlanýda, onyń sheńberinde forým qatysýshylary «Birge – taza Qazaqstan» respýblikalyq aktsiiasyna qosylatyn bolady.
Sondai-aq, platformada ÚEU áleýmettik jobalarynyń konkýrsy ótkizildi. 144 ótinimniń ishinen ÚEU-nyń 100 jobasy úzdik dep tanyldy. Forým barysynda atalǵan jobalardyń tanystyrylymyn ótkizý josparlanýda.
Árbir tilek bildirýshi forým jumysyna onlain-tirkeýden ótip qatysa alady.
Forýmnyń Qazaqstan Respýblikasynyń Aqparat jáne qoǵamdyq damý ministrligi, Pavlodar oblysynyń ákimdigi jáne «Azamattyq bastamalardy qoldaý ortalyǵy» KEAQ uiymdastyrady.
Forýmnyń negizgi seriktesteri - Eurasian Resources Group (ERG), Konrad Adenaýer atyndaǵy qor jáne «Atameken» UKP.
