QR Premer-Ministri Asqar Maminniń tóraǵalyǵymen Tsifrlandyrýdy engizý máseleleri jóninde QR Prezidenti janyndaǵy Komissiianyń otyrysy ótti, dep habarlaidy "Ult aqparat" primeminister.kz saityna silteme jasap.
Otyrysta QR Tuńǵysh Prezidenti – Elbasy Nursultan Nazarbaevtyń bastamasymen qolǵa alynǵan «Tsifrlyq Qazaqstan» memlekettik baǵdarlamasynyń iske asyrylý barysy jáne Memleket basshysy Qasym-Jomart Toqaevtyń el ekonomikasyn tsifrlandyrýdy jedeldetý jónindegi tapsyrmalarynyń oryndalýy qaraldy.
Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev jer qatynastary salasynda tsifrlandyrýdy engizý, sondai-aq memlekettik qyzmetterdi avtomattandyrý jáne ońtailandyrý boiynsha qabyldanyp jatqan sharalar týraly baiandady.
«Tsifrlyq Qazaqstan» memlekettik baǵdarlamasynda 2021 jylǵa qarai Ulttyq keńistiktik derekterdiń infraqurylymynyń, Jyljymaityn múliktiń biryńǵai memlekettik kadastrynyń aqparattyq júiesin qurý jáne engizý qarastyrylǵan. Bul Qazaqstannyń tsifrlyq kartasyn qalyptastyrýǵa, halyqtyń jer qatynastary men sáýlet salasyndaǵy qyzmetterdi alý rásimin jeńildetýge, jer telimderin paidalanýdy baqylaý men monitoring júrgizýdi avtomattandyrýǵa jol ashady.
Qazaqstannyń Tuńǵysh Prezidentti – Elbasynyń 2018 jylǵy 5 qazandaǵy halyqqa arnaǵan Joldaýynda 2019 jyldyń sońyna deiin memlekettik qyzmetterdiń 80%, al 2020 jyldyń sońyna qarai 90% elektrondy formatqa kóshirýdi qamtamasyz etý tapsyryldy. Osy jyldyń qyrkúieginde túzetýler engizilgennen keiin Memlekettik qyzmetter tizilimi 723 qyzmetti qamtidy, olardyń 579-y (80,08%) elektrondy túrde qoljetimdi bolady.
Otyrysty qorytyndylai kele, QR Premer-Ministri Asqar Mamin tsifrlyq kún tártibiniń mańyzdylyǵyn atap ótip, ekonomika salasynda tsifrlyq sheshimderdi engizý jumystaryn jandandyrýdy tapsyrdy.
