Foto: Tengrinews.kz/Álihan Sariev
Premer-ministr Álihan Smaiylovtyń tóraǵalyǵymen ótken quqyq buzýshylyqtardyń aldyn alý jónindegi vedomstvoaralyq komissiia otyrysynda otbasylyq-turmystyq zorlyq-zombylyqtyń aldyn alý sharalaryn kúsheitý jáne qaýipsizdikti qamtamasyz etýdiń servistik modelin engizý máseleleri qaraldy, - dep habarlaidy "Ult aqparat" Primeminister.kz saityna silteme jasap.
Ishki ister ministriniń birinshi orynbasary Marat Qojaev politsiiaǵa jyl saiyn turmystyq zorlyq-zombylyq faktileri boiynsha 100 myńnan asa ótinish kelip túsetinin baiandady. Bul rette jaǵdailardyń 60 paiyzynda jábirlenýshiler quqyq buzýshylarǵa qatysty sharalar qabyldaýdan bas tartady. 2022 jyly 37 myń adam ákimshilik jaýapkershilikke tartyldy. Bul rette otbasylyq-turmystyq qatynastar salasyndaǵy qylmystyq quqyq buzýshylyqtar sany 7 paiyzǵa (623-ten 583-ke deiin) tómendedi.
Memleket basshysynyń tapsyrmasy boiynsha IIM otbasylyq-turmystyq saladaǵy zorlyq-zombylyqtyń aldyn alý úshin jaýapkershilikti qatańdatý sharalaryn, sondai-aq otbasynyń shyrqyn buzýshylardy ońaltý jáne olarmen tárbie jumysyn júrgizýdi qamtityn qadamdardy ázirledi.
Osylaisha, bul saladaǵy is-qimyldardy úilestirý úshin ýákiletti memlekettik organdy belgileý usynylyp otyr, bul repressivti sharalarǵa emes, azamattardyń áleýmettik-ekonomikalyq problemalaryn, balalardy tárbieleý jáne jalpy, otbasy mártebesin kóterý máselelerin sheshýge basymdyq berýge jol ashady.
Sonymen qatar turmystyq qylmystardy tirkeýdiń ótinish berý túrinen anyqtaý sipatyna kóshý josparlanýda, bul politsiiaǵa quqyq buzýshyny jábirlenýshilerdiń ótinishinsiz, iaǵni turmystyq zorlyq-zombylyq jasaý faktisi boiynsha jaýapqa tartýǵa múmkindik beredi. Osylaisha, jazanyń bultartpaýshylyq printsipi qamtamasyz etiledi.
Budan basqa, ákimshilik qamaýǵa alýdyń eń az merzimin 5 táýlikten bastap (buryn bolmaǵan) belgileý, tergeý kezeńinde otbasynyń shyrqyn buzýshyny oqshaýlaý jáne ony sottyń qamaýǵa alý múmkindigin qarastyrý, sondai-aq taraptardyń tek bir ret jáne sotta ǵana tatýlasýyna múmkin berý usynylyp jatyr.
Osy taqyryp boiynsha Bas prokýrordyń orynbasary Jandos Ómiraliev, eńbek jáne halyqty áleýmettik qorǵaý ministri Tamara Dúisenova jáne ádilet vitse-ministri Alma Muqanova baiandama jasady.
Premer-ministr turmystyq zorlyq-zombylyqtyń aldyn alýda jańa áleýmettik servisterdi, onyń ishinde otbasynyń tsifrlyq kartasyn belsendi qoldaný qajettigin atap ótti.
"Tsifrlyq tehnologiialardy jáne derekterdi taldaýdy paidalana otyryp, qandai da bir problemalar týyndaýy múmkin qaýipti aimaqtaǵy otbasylardy anyqtaý qajet. Qylmystardyń nemese basqa da zańsyz áreketterdiń jasalýyn kútpei, eń aldymen, osylarǵa nazar aýdarý kerek. Quqyq buzýshylyqtyń saldarymen kúresýden góri onyń aldyn alǵan áldeqaida durys", - dedi premer-ministr.
Onyń aitýynsha, óńirler ákimderiniń qyzmetin baǵalaý reitingine turmystyq zorlyq-zombylyqtyń aldyn alý deńgeiiniń indikatorlaryn engizý máselesin qarastyrý, sondai-aq daǵdarys ortalyqtarynyń tapshylyǵy máselesin sheshý jóninde sharalar qabyldaý qajet.
Ishki ister ministrligine otbasylyq-turmystyq saladaǵy zorlyq-zombylyq úshin jaýapkershilikti qatańdatý jónindegi zań jobasyn ázirleý sheńberinde halyqpen keńinen túsindirý jumystaryn júrgizý tapsyryldy.
Sondai-aq, VAK otyrysynda qaýipsizdikti qamtamasyz etýdiń servistik modeline kóshý máselesi qaraldy, onyń sheńberinde azamattarǵa sapaly politsiia qyzmetterin kórsetýge jáne quqyqtyq tártip salasyndaǵy problemalardy birlesip anyqtaý jáne sheshý úshin memlekettik institýttardyń qoǵammen turaqty áriptestik qatynastaryn qalyptastyrýǵa basa nazar aýdarylady.
Premer-ministr IIM-ge memlekettik organdardyń osy baǵyttaǵy jumysyn tiimdi úilestirýdi qamtamasyz etýdi, al óńirlerdiń ákimdikterine jergilikti jerlerde servistik modeldi sapaly masshtabtaý jóninde sharalar qabyldaýdy tapsyrdy.
"Bul – Memleket basshysy bastamashy bolǵan quqyq qorǵaý salasyndaǵy mańyzdy reformalardyń biri. Jyl qorytyndysy boiynsha árbir óńirdiń osy baǵyttaǵy jumysyna baǵa beriledi", - dedi Álihan Smaiylov.
