QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Qaraǵandy oblysynda mindetti áleýmettik meditsinalyq saqtandyrýdy (MÁMS) engizý boiynsha pilottyq jobanyń iske asyrylý qorytyndylary qaraldy, dep habarlaidy "Ult aqparat".
Osy jyldyń 1 qyrkúieginen bastap Qaraǵandy oblysynda pilottyq joba iske asyrylýda, ol MÁMS júiesin aprobatsiialaýǵa jáne ony Qazaqstanda tolyq kólemde engizýge daiyndalýǵa múmkindik berdi. Óńirde eki aida turǵyndardy meditsinalyq saqtandyrý (192%-ǵa) esebinen ońaltý kómegi (42,2%-ǵa) jáne qymbat zertteýlermen (KT jáne MRT) qamtý kólemi artty.
Tegin meditsinalyq kómektiń kepildik berilgen kóleminiń (TMKKK) jańa modeli jáne MÁMS paketi 2020 jyldyń 1 qańtarynan bastap úsh deńgeili meditsinalyq qamsyzdandyrý júiesin engizýdi qarastyrady.
Birinshi deńgei — TMKKK jańa modeli memleket mindettemeleriniń naqty shekterin anyqtaidy jáne halyqty bazalyq meditsinalyq qyzmettermen jalpylama qamtý boiynsha jalpyǵa birdei tanylǵan halyqaralyq standartty júzege asyrady.
Ekinshi deńgei — saqtandyrylǵan turǵyndarǵa arnalǵan MÁMS paketi, bul TMKKK tys meditsinalyq kómektiń qoljetimdiligin qamtamasyz etedi.
Úshinshi deńgei — bul TMKKK jáne MÁMS paketterine kirmeitin meditsinalyq qyzmetter. Olar aqyly túrde nemese erikti meditsinalyq saqtandyrý esebinen qamtamasyz etiledi.
Memleket halyqty alǵashqy meditsinalyq-sanitarlyq kómek deńgeiinde bazalyq meditsinalyq qyzmetterdiń qajetti paketimen (profilaktikalyq egýler men meditsinalyq tekserýler, patronaj, júktilik kezinde qaraý jáne t.b.) jáne jedel jáne shuǵyl kómekke qoljetimdilikpen qamtamasyz etýdi jalǵastyrýda.
MÁMS engizýdi eskere otyryp, jalpy alǵanda 2020 jyly densaýlyq saqtaý salasyna arnalǵan biýdjet elimiz boiynsha shamamen 1,5 trln teńgeni quraidy, onyń ishinde MÁMS esebinen 500 mlrd teńgeden astam qarajat. Meditsinalyq ońaltýdy qosa alǵanda, halyqtyń qajettilikterine negizdelgen meditsinalyq kómektiń basym túrlerin qarjylandyrý edáýir artady, ol kelesi jyly 7 esege jáne 2025 jylǵa qarai 11 esege deiin ulǵaiady. Kelesi jyly meditsina qyzmetkerleriniń jalaqysy dárigerlerge 30%-ǵa jáne orta meditsina qyzmetkerine 20%-ǵa, al 2025 jylǵa qarai olar qazirgi jalaqymen salystyrǵanda 2 ese ósedi.
«Elbasy N. Nazarbaev mindetti áleýmettik meditsinalyq saqtandyrýǵa kóshýge tolyq daiyndyqty qamtamasyz etý mindetin qoidy. Memleket basshysy Q. Toqaev óz Joldaýynda áleýmettik meditsinalyq saqtandyrýdy iske asyrý máselesine úlken jaýapkershilikpen qaraý qajettigin eskertti. Onymen barlyq qazaqstandyq qamtylýy tiis. Ol úshin barlyq deńgeidegi meditsinalyq mekemeler qajetti aqparattyq júielerge qosylýy kerek. Árbir azamattyń derekteri jańartylýy tiis», — dedi A. Mamin.
Premer-Ministr MÁMS engizý boiynsha pilottyq jobanyń nátijesin oń baǵalap, Qaraǵandy oblysynyń bul tájiribesin basqa óńirler de eskerýi qajet ekenin aitty.
Úkimet basshysy osy jyldyń sońyna deiin meditsinalyq uiymdardyń MÁMS iske qosýǵa tolyq daiyndyǵyn qamtamasyz etýdi, turǵyndar týraly derekterdiń tolyq jańartylýyn aiaqtaýdy jáne balalar, stýdentter men úsh jasqa deiingi balalardy tárbielep otyrǵan, jumyssyz azamattar boiynsha aqparattyq júielerdegi derekterdiń dáldigin qamtamasyz etýdi tapsyrdy.
Jiynda QR densaýlyq saqtaý ministri E. Birtanov, Qaraǵandy oblysynyń ákimi J. Qasymbek, «Mindetti áleýmettik meditsinalyq saqtandyrý qory» KEAQ basqarma tóraǵasy A. Jumaǵulov baiandama jasady.
