Búgin Úkimet otyrysynda QR Aýyl sharýashylyǵy ministri Erbol Qarashókeev Agroónerkásiptik keshendi damytýdyń 2021-2025 jyldarǵa arnalǵan ulttyq jobasyn tanystyrdy, dep habarlaidy QazAqparat.
«Memleket basshysynyń tapsyrmasy boiynsha ministrlik Agroónerkásiptik keshendi damytýdyń 2021-2025 jyldarǵa arnalǵan ulttyq jobasyn ázirledi. Ulttyq jobany ázirleý kezinde agroónerkásiptik keshendi damytýdaǵy jahandyq syn-qaterler men álemdik trendter, aldyńǵy memlekettik jáne salalyq baǵdarlamalardy iske asyrý qorytyndylary eskerildi. Ulttyq jobany ázirleýge halyqaralyq FAO uiymynyń sarapshylary tartyldy», - dedi Erbol Qarashókeev.
Ulttyq jobanyń mynadai negizgi mindetteri aiqyndaldy:
- eńbek ónimdiligin 2,5 ese arttyrý;
- otandyq óndiristiń negizgi azyq-túlik taýarlarymen qamtamasyz etilýi;
- óńdelgen ónim úlesin 70%-ǵa deiin jetkize otyryp, agroónerkásiptik keshen ónimderiniń eksportyn 2 esege ulǵaitý;
- 7 iri ekojúie qalyptastyrý jáne investitsiialyq jobalardy iske asyrý esebinen 1 mln aýyl turǵynynyń tabysyn turaqty arttyrý.
«Eńbek ónimdiligin 2,5 ese arttyrý maqsatyna qol jetkizý úshin negizgi faktorlar aiqyndaldy.Tuqym sharýashylyǵyn memlekettik qoldaý sharalaryn iske asyrý, tuqymdardy qadaǵalaý júiesin qurý, sondai-aq tuqym ósirý sharýashylyqtaryn qazirgi zamanǵy tehnikamen jáne jabdyqtarmen tehnikalyq jaraqtandyrý esebinen damytý josparlanyp otyr. Mineraldy tyńaitqyshtardy qoldaný deńgeiin arttyrý maqsatynda ónerkásiptik óndiristiń organikalyq tyńaitqyshtaryn sýbsidiialaý jáne agrohimiialyq qyzmettiń respýblikalyq ǵylymi-ádistemelik ortalyǵynyń qyzmeti men materialdyq-tehnikalyq bazasyn jetildirý kózdelgen. Tehnikalyq jaraqtandyrylý deńgeiin arttyrý maqsatynda investitsiialyq sýbsidiialaý jalǵastyrylady, sondai-aq «QazAgroQarjy» AQ arqyly aýyl sharýashylyǵy tehnikasynyń lizingi baǵdarlamalary keńeitiledi. Sondai-aq sý únemdeý tehnologiialaryn keńinen engizý, sý berýdi sýbsidiialaý tetigin jetildirý jóninde sharalar qabyldanady. Bul sý únemdeý tehnologiialary qoldanylatyn alańdardy 450 myń gektarǵa deiin ulǵaitýǵa múmkindik beredi», - dedi ministr.
