Kez kelgen politsei azamattyń qujatyn tekserýge quqyly. Bul týraly ishki ister ministri Erlan Turǵymbaev aitty, dep habarlaidy Sputnik Qazaqstan.
Búgin tańerteń elordadaǵy ministrlikter úii men úkimet ǵimaraty aldynda kúzet kúsheitildi. Arnaiy jasaq sarbazdary ári-beri ótken azamattardyń qujatyn surap, tekserip jatty. Úkimet otyrysynan keiin jýrnalister ishki ister ministri Erlan Turǵymbaevtan munyń sebebin surady.
"Bizde komendant saǵaty degen joq. Memleket tarapynan kúzetiletin memlekettik nysandar bar. Arnaiy kúzet qyzmeti jumys isteidi. Osy ǵimarattarǵa kirgen adam qujatyn kórsetýge mindetti", - dedi IIM basshysy úkimet kýlýarynda.
Ministr kóshede erlerdi de, áielderdi de birdei tekseretinin atap ótti.
"Bizde bárin tekseredi. Zań buzǵandar ákimshilik jazaǵa tartylady. Eger adam tártip buzbasa, ony eshkim toqtatyp teksermeidi", - dedi ol.
Turǵymbaev zańsyz ustalǵan azamattardyń aryzyn jeke qaraýǵa daiyn ekenin jetkizdi.
"Taǵy da resmi túrde málimdeimin: zańsyz tekserý men zańsyz ustap áketýge qatysty azamattardyń aryz-shaǵymyn kún demei, tún demei, qabyldaýǵa daiynmyn. Azamattardy jeke qabyldaityn kún bar. Kez kelgen ýaqytta kezdesýge daiynmyn", - dedi ministr.
Al BAQ ókilderiniń "arnaiy jasaq sarbazdary qujat tekserýge quqyly ma?" degen suraǵyna:
"Bizde kez kelgen politsiia qyzmetkeri qujat tekserýge quqyly. Eger oǵan negiz bolsa, árine", - dep jaýap qatty Turǵymbaev.
