QR Premer-Ministri Oljas Bektenov Úkimettiń tótenshe rezervinen Qostanai oblysynda aýqymdy sý tasqyny saldarynan zaqymdalǵan elektr berý jelilerin qalpyna keltirýge 1,3 mlrd teńgeden astam qarajat bólý týraly qaýlyǵa qol qoidy. Bul týraly Premer-Ministrdiń resmi aqparattyq resýrsy málimdedi, -dep habarlaidy "Ult Aqparat".
Jóndeý jumystary Arqalyq qalasynda, Amangeldi jáne Jangeldi aýdandarynda júrgiziledi, bul jergilikti turǵyndardy turaqty elektrmen qamtamasyz etýge múmkindik beredi.
Biyl 27 naýryzda ózender men sý aidyndaryndaǵy sý deńgeiiniń birden kóterilýine bailanysty Qostanai oblysynyń ońtústik aýdandary sý astynda qaldy. Sonyń saldarynan áýedegi elektr jelileri men transformatorlyq qosalqy stansalardyń tirekteri astyndaǵy topyraq shaiylyp ketti. Bul olardyń zaqymdalýyna jáne 37 eldi mekenniń turǵyndaryn elektrmen jabdyqtaýdy shekteýge ákeldi. Tehnikalyq tekseris qorytyndysy boiynsha 989 zaqymdalǵan tirek anyqtaldy.
Búgingi tańda barlyq iri eldi mekenderde elektrmen jabdyqtaý ýaqytsha shema boiynsha qalpyna keltirildi. Jóndeý brigadalary sý tasqynynyń saldaryn múmkindiginshe tez joiý úshin jumysty jalǵastyrýda.
Esterińizge sala keteiik, 21 maýsymda Parlament palatalarynyń birlesken otyrysynda QR Premer-Ministri Oljas Bektenov júrgizilip jatqan jumys barysyna túsinikteme bergen bolatyn.
Barlyǵy 12 myń turǵyn úi (JTQ) jáne 26 myń saiajai ýchaskeleri sý astynda qaldy. Zaqym kelgen 17 982 úige tekserý jasalyp, 15 685-in baǵalaý jumysy aiaqtaldy. Olardyń jartysyna jýyǵy jóndeýdi jáne qalpyna keltirýdi qajet etedi. Osy maqsattarǵa 38,6 mlrd teńge bólinip, 5823 otbasy ótemaqy aldy.
8 myńnan astam úi apatty dep tanyldy. Olar boiynsha azamattardyń talap-tilegine bailanysty zalaldy óteýdiń 2 nusqasy qarastyrylǵan: qaitalama naryqta páter nemese úi satyp alý; úi salyp berý.
3155 otbasy jańa baspana aldy. Óńirlerde 2049 úidiń qurylysy belsendi júrgizilip jatyr. Jalpy turǵyn úidi qalpyna keltirýge jáne salýǵa 251 mlrd teńge baǵyttaldy.
Sonymen qatar injenerlik, áleýmettik infraqurylymǵa jáne joldarǵa ziian keldi. Atap aitqanda, 2,3 myńnan astam energiiamen jabdyqtaý tirekteri qirap, 54 km jeli úzildi. 40%-dan astamy búginde qalpyna keltirildi, jaz ailarynda jumys qarqyny artady.
