QR Premer-Ministri Asqar Maminniń tóraǵalyǵymen ótken Úkimet otyrysynda QR Prezidenti Qasym-Jomart Toqaevtyń «Jańa jaǵdaidaǵy Qazaqstan: is-qimyl kezeńi» Joldaýyn iske asyrý jónindegi jalpyulttyq is-sharalar jospary qaraldy, dep habarlaidy "Ult aqparat".
Ulttyq ekonomika ministri R. Dálenov usynǵan Jalpyulttyq jospar (JUJ) Memleket basshysy belgilegen negizgi baǵyttar boiynsha 143 tarmaqtan turady, onyń ishinde «memlekettik basqarýdyń jańa modeli» – 10 tarmaq, «jańa jańdaidaǵy ekonomikalyq damý» – 42 tarmaq, «teńgerimdi aýmaqtyq damý» – 2 tarmaq, «azamattardyń áleýmettik ál-aýqaty – basty basymdyq» – 10 tarmaq, «qoljetimdi jáne sapaly bilim berý» – 16 tarmaq, «densaýlyq saqtaý júiesin damytý» – 10 tarmaq, «ekologiia jáne bioalýantúrlilikti qorǵaý» – 8 tarmaq, «azamattardyń múddelerin qorǵaýdaǵy ádiletti memleket» – 30 tarmaq, «tsifrlandyrý – barlyq reformalardyń bazalyq elementi» – 8 tarmaq, «memleketti basqarýǵa azamattyq qatysý» – 7 tarmaq.
Premer-Ministr Úkimettiń basty mindeti halyqtyń ál-aýqatyn arttyrý, ekonomikany damytý jáne turaqty jumys oryndaryn qurý ekenin atap ótti. Biýdjettik josparlaýdyń jańa júiesinde ulttyq basymdyqtar qamtamasyz etiledi jáne biýdjetten tys qorlardyń qarajatyn eskere otyryp, «keńeitilgen biýdjet» engiziledi.
Azamattardyń áleýmettik ál-aýqatyn qamtamasyz etý maqsatynda turǵyn úige qoljetimdilikti keńeitý, qolaily otbasylyq-demografiialyq jaǵdailar jasaý, ekologiiany, bilim berý sapasyn jaqsartý, sondai-aq densaýlyq saqtaý júiesin jetildirý jóninde sharalar qabyldanady.
«Búgin tanystyrylǵan Memleket basshysynyń Joldaýyn iske asyrý jónindegi Jalpyulttyq is-sharalar jospary alǵa qoiylǵan mindetterge sai keledi. Prezident jospardy bekitkennen keiin barlyq memlekettik organdar men ákimdikter ony dereý oryndaýǵa kirisýi tiis», — dedi Mamin.
Úkimet basshysy ortalyq jáne jergilikti atqarýshy organdardyń birinshi basshylary jospar is-sharalarynyń sapaly ári ýaqytyly oryndalýyn qamtamasyz etýi tiis ekenin atap ótti.
«Bizden jedeldik pen naqty nátije talap etiledi», — dep túiindedi Mamin.
