Búgin Úkimet otyrysynda QR Prezidenti Qasym-Jomart Toqaevtyń Joldaýyn iske asyrý Jalpyulttyq jospary qabyldandy, dep habarlaidy QazAqparat.
«Memleket basshysy Qasym-Jomart Toqaev óziniń Qazaqstan halqyna Joldaýynda memlekettik jáne ekonomikalyq saiasattyń jańa mindetterin belgilep berdi. Joldaýdy iske asyrý úshin Jalpyulttyq jospar ázirlendi. Ol Joldaýdyń negizgi baǵyttary men Memleket basshysynyń bastamalary boiynsha mindetterdi sapaly ári jedel sheshýge baǵyttalǵan», - dedi Úkimet otyrysynda Premer-Ministr Asqar Mamin.
Onyń atap ótýinshe, Úkimet pandemiiadan keiingi kezeńde ekonomikanyń ornyqty ári sapaly ósýin qamtamasyz etý, densaýlyq saqtaý, bilim berý, mádeniet salalaryn jetildirý, óńirlerdi keshendi damytý, eńbek naryǵynyń tiimdi ekojúiesin qurý boiynsha belsendi is-sharalar qabyldaidy.
«Memleket basshysynyń azamattardyń ál-aýqatyn arttyrý jónindegi bastamalaryn iske asyrý Úkimet jumysynyń mańyzdy baǵyty bolady. Jalaqyny kóterý, jeke sektordyń úlesin ulǵaitý, salyqtyq júktemeni azaitý arqyly naqty tabystyń ósýin qamtamasyz etýge erekshe nazar aýdarylady. Usynylyp otyrǵan Memleket basshysynyń Joldaýyn iske asyrý jónindegi Jalpyulttyq is-sharalar jospary alǵa qoiylǵan mindetterge tolyqtai sai. Barlyq birinshi basshylarǵa Jospardyń is-sharalarynyń sapaly ári ýaqtyly oryndalýyn qamtamasyz etý boiynsha derbes jaýapkershilik júkteledi», - degen Úkimet basshysy Memleket basshysy Jarlyǵynyń jobasyna daýys berýdi usyndy.
Jobany Úkimet músheleri biraýyzdan qoldap, qabyldandy.
«Ulttyq ekonomika ministrligine Premer-Ministr Keńsesimen birge óte qysqa merzimde Jarlyq jobasyn Prezident Ákimshiligine engizýdi tapsyramyn», - dedi Asqar Mamin.
