Prezident tapsyrmasyn júzege asyrýdyń is-sharalar josparyn daiyndaǵan soń árbir memlekettik organ ózine júktelgen tapsyrmalar týraly tolyq málimet beredi. Bul týraly onlain brifingte QR Aqparat jáne qoǵamdyq damý ministri Dáýren Abaev aitty, dep habarlaidy QazAqparat.
«Búgin Qaraǵandy qalasynda 62 jastaǵy azamat koronavirýstan qaitys boldy. Osyǵan bailanysty marqumnyń otbasy men jaqyndaryna kóńil aitamyn. Bolǵan iske sabyr etińizder», - dedi QR Aqparat jáne qoǵamdyq damý ministri Dáýren Abaev.
Sondai-aq, ol keshegi Memleket basshysy Qasym-Jomart Toqaevtyń halyqqa joldaǵan úndeýi jaily aitty.
«Prezident óz úndeýinde daǵdarysqa qarsy sharalardyń ekinshi paketimen tanystyrdy. Bul sharalar buqaralyq aqparat quraldarynda keń kólemde jariialanýda. Sonymen birge, Úkimet Prezident tapsyrmasyn júzege asyrýdyń is-sharalar josparyn daiyndap jatyr. Daiyn bolǵan kezde árbir memlekettik organ ózine júktelgen tapsyrmalar týraly tolyq málimet beredi. Iaǵni memlekettiń kómegin, qalai, qai jerde, qandai tártippen alý kerek ekeni naqty túsindiriledi. Qazir bul mehanizmder pysyqtalýda. Sondyqtan úlgermei qalamyz dep ýaiymdaýdyń qajeti joq. Kómekke muqtaj barlyq adamǵa járdem beriledi, memleket eshkimdi qamqorlyqsyz qaldyrmaidy», - deidi ol.
