Búgin QR Premer-Ministri Asqar Maminniń tóraǵalyǵymen ótken Úkimet otyrysynda Jastar jylyn ótkizý boiynsha Jol kartasyna arnalǵan tolyqtyrýlar maquldandy, dep habarlaidy "Ult aqparat".
Bul qujat jastardyń tabysty áleýmettenýi úshin jaǵdailar jasaýǵa jáne olardyń áleýetin eldiń odan ári damýyna baǵyttaýǵa yqpalyn tigizedi.
QR Aqparat jáne qoǵamdyq damý ministri Dáýren Abaev Jastar jylyn ótkizý boiynsha Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń tórt basty blok boiynsha naqty mindetter qoiǵanyn baiandady:
· qoljetimdi bilim men talanttardy qoldaý;
· jumyspen qamtamasyz etý;
· áleýmettik qoldaý;
· azamattyq ustanym men etnosaralyq kelisimdi, patriottyqty nyǵaitý.
Tuńǵysh Prezident atap ótkendei: «El keleshegi jas urpaq tárbiesine tikelei bailanysty». Sondyqtan memlekettik jastar saiasatynyń maqsaty – olarǵa tolyqqandy rýhani, mádeni, bilim berý, kásibi jáne fizikalyq turǵydan jan-jaqty qoldaý bildirý. Barlyq kórsetilgen baǵyttardy iske asyrý úshin Úkimet Jastar jylyn ótkizý jónindegi Jol kartasyn qabyldady. 23 qańtar kúni Ult kóshbasshysy jastar forýmy barysynda jastardyń sózin tyńdady jáne olardyń usynystaryn qujatqa engizýdi tapsyrdy.
Birinshi. Bilim jáne ǵylym ministrligimen birlesip, jas qazaqstandyqtardyń kásiptik baǵdaryn anyqtaýǵa baǵyttalǵan «Ózińdi tap» jobasyn iske qosý. Iaǵni jastarǵa ózi qyzyǵatyn durys mamandyq tańdaýyna baǵyt berý kerek.
Ekinshi. Elimizdiń aimaqtarynda búrkitshiler ortalyǵyn ashý jáne damytý sharalaryn qabyldaý. Jattyǵý ortalyqtaryn ashyp, túrli deńgeidegi jarystar ótkizip qana qoimai, Mádeniet jáne sport ministrligimen birigip bul kóne ónerdi Qazaqstandaǵy etnotýrizmniń mańyzdy elementine ainaldyrý josparlanǵan.
Úshinshi. Ózin-ózi qorǵaý boiynsha tegin sheberlik-synyptaryn ótkizýdi qarastyrýmen jastarǵa arnalǵan sporttyq klýbtardy damytý boiynsha tiisti sharalar qabyldaý.
Tórtinshi. Elimizdegi JOO-larmen jáne kolledjdermen birigip «Stýdenttik bastama» dep atalatyn jalpyrespýblikalyq volonterler qozǵalysyn jáne jas volonterler bazasyn qurý. Osylaisha, múmkindigi shekteýli jandarǵa, qarttarǵa, jetimder men jalǵyzbasty, úisiz-kúisiz adamdarǵa kómek kórsetý.
Besinshi. Media salanyń kelesheginen úmit kúttiretin jas ókilderin tarta otyryp, Qazaqstan ulttyq brendin alǵa jyljytýǵa baǵyttalǵan jańa quraldar jasaý.
Osylaisha, búgingi tańda Jol kartasynyń jobasy 89 tarmaqtan turady jáne bes baǵyty bar.
Birinshi baǵyt – Eńbek etip júrgen jastardy baspanamen qamtamasyz etý. Nur-Sultan, Almaty men Shymkent qalalarynda jyl saiyn jas mamandarǵa arnalǵan myńǵa jýyq jalǵa beriletin turǵyn úi turǵyzý josparlanǵan. Ol baspanalar kásiporyndarda, aýyl sharýashylyǵy men biýdjettik mekemelerde, ǵylym salasynda jumys isteitin jas mamandarǵa, jańa is bastaǵan kásipkerlerge arnalyp salynady. Otbasyndaǵy bala sany, arnaiy kútimdi qajet etetin bala tárbielep otyrǵandar, tolyq emes otbasylar jáne taǵy basqa faktorlar da eskeriletin bolady.
Ekinshi baǵyt – jastardy eńbekpen qamtý. «Jas kásipker» baǵdarlamasyn júzege asyrý qarastyrylǵan. Úsh jyldyń ishinde 60 myńnan astam jas kásipkerlik negizderi boiynsha oqytylady. Aýyldaǵy jastarǵa 15 myń shaǵyn nesie berý josparlanǵan. Al jańa biznes-ideialardy júzege asyrý úshin 30 myńnan asa memlekettik grant bólinedi.
Úshinshi baǵyt – bilim berý men volonterler uiymdaryn damytý. Qazir «Jas maman» dep atalatyn baǵdarlama ázirlenip jatyr. Osy baǵdarlama arqyly suranysqa ie 100 indýstrialdy jáne servistik kásip boiynsha mamandar daiyndalady. Bul baǵyttaǵy jumystar 3 jyl boiy elimizdegi 20 aldyńǵy qatarly JOO men 180 kolledjdiń bazasynda, elimizdiń barlyq óńirlerinen 200 myń jasty qamtýmen júzege asady.
«Ashyq ýniversitet» jobasyna barlyq joǵary oqý oryndary men kolledjderdi qosý da josparlanǵan. Sonymen qatar irgeli ári qoldanbaly zertteýlerdi granttyq qarjylandyrý jylyna 3 milliard teńgege ulǵaitylatyn bolady. Volonterlyq sharalarǵa belsene qatysyp júrgen stýdentterdiń shákirtaqysy 30%-ǵa kóbeitiledi.
Tórtinshi baǵyt – jastardyń áleýmettik belsendiligin damytý. «Jasyl El» qozǵalysynyń negizinde «Jasyl qala – Jasyl aýyl» jalpyulttyq jobasyn júzege asyrý qarastyrylyp otyr. Qurylys kompaniialarynda stýdenttik qurylys otriadtary úshin kvota bólinedi. 2025 jylǵa deiingi áskeri-patriottyq tárbieleý baǵdarlamasy jáne taǵy basqalary ázirlenedi.
Besinshi baǵyt – bul jas otbasylardy, densaýlyq pen áleýmettik inkliýzivtilikti qoldaý boiynsha sharalar kesheni. Mysaly, aimaqtyq jastar chempionaty men stýdentter ýniversiadalaryn jappai ótkizý tájiribesin jańartý josparlanǵan. Jospardyń aiasynda birqatar keshendi jobalardy júzege asyrý qarastyrylǵan. Olardyń ishinde túrli jastar sanatyn áleýmettendirý, sýitsidtiń aldyn-alý, otbasy institýtyn nyǵaitý jáne otbasylyq qundylyqtardy alǵa jyljytý, daryndy jastardy qoldaý jáne taǵy basqa baǵyttar bar.
Jalpy, atalǵan baǵyttardyń barlyǵyn júzege asyrý jas otbasylardyń áleýmettik ahýalyn arttyrýǵa, adami kapitalynyń sapasyn ósirýge, sondai-aq jastardyń túrli sanattarynyń tiimdi áleýmettenýine múmkindik beredi.
Máseleni qaraý barysynda jastarmen júrgizilip jatqan jumystar týraly baiandamamen Jambyl oblysynyń ákimi A. Myrzahmetov pen Shymkent qalasynyń ákimi Ǵ. Ábdirahymov baiandama jasady.
QR Premer-Ministriniń orynbasary G. Ábdiqalyqova Parlament Senatynda qaralyp jatqan respýblikalyq biýdjetke ózgeristerde Jastar jylyn ótkizýge 24,6 mlrd teńge qarastyrylǵanyn atap ótti jáne barlyq ministrlikterdi júrgizilip jatqan jumystarǵa belsene atsalysýǵa shaqyrdy. Bul oraida negizgi máseleler jastardy jumys oryndarymen qamtý, óz isin ashýǵa grant usyný, jastar is-tájiribesi máselesine erekshe kóńil bólý bolyp tabylady. Sondyqtan bul áleýmettik blok ministrlikterine ǵana emes, basqalaryna da qatysty.
