Qazaqstannyń avtobiznes qaýymdastyǵy otandyq kólik markasyn ázirleýge kiristi, dep xabarlaidy QazAqparat tilshisi.
Uiym basshysy Andrei Lavrentevtiń aitýynsha, sheteldik investorlar da qazaqstandyq kóliktiń markasyna qarjy salýǵa daiar.
«Qazirgi kezde biz osy máseleni jan-jaqty zerdelep jatyrmyz. Máselen, qytailyq «Jac» kompaniiasy qazaqstandyq brendti jasap shyǵýǵa múddeli. Soǵan qarjy quiýǵa da daiyn. Ol ózbektiń «Uz-Daewoo» nemese reseilik «Lada» siiaqty otandyq kólik markasy bolady. Osy saladaǵy jumys naqty qai ýaqytta aiaqtalatynyn aita almaimyn. Degenmen, tapsyrma bar. Úkimet te naqty mindet qoidy. Eń bastysy, investorlar tarapynan qyzyǵýshylyq bar. Bálkim, aldaǵy ýaqytta qazaqstandyqtarǵa qýanyshty xabardy jetkizip qalarmyz», - dedi A.Lavrentev Astanada ótken baspasóz máslixatynda.
Onyń sózine qaraǵanda, ázirshe otandyq kólik markasyna qatysty naqty ataýlar joq. «Jac» kompaniiasy tarapynan usynys boldy. Endi ony qolǵa alyp, iske asyrý qajet.
«Osy saladaǵy jumys endi bastaldy deýge bolady. Ázirshe, naqty bir nárse aitý qiyn. Otandyq markaǵa qatysty ataýlar da joq. Shynymdy aitsam, osy máselege qatysty aqparattyń egjei-tegjeiin aita almaimyn», - dep atap kórsetti A.Lavrentev.
Aita keteiik, búgin Qazaqstannyń avtobiznes qaýymdastyǵy ótken jyldyń qorytyndysyn shyǵardy. Uiymnyń vitse-prezidenti Anar Maqashevanyń aitýynsha, ótken jyly qazaqstandyqtar 60 myń jańa kólik satyp alǵan. Sonyń teń jartysy - óz elimizde qurastyrylǵan avtomobilder. Jalpy, Qazaqstan xalqy jańa kólikterdi satyp alýǵa 547 mlrd teńgeni jumsady. Bul 2017 jylmen salystyrǵanda 24 protsentke artyq.
