QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń kezekti otyrysy ótti, dep habarlaidy QR Úkimetiniń baspasóz qyzmeti.
Elimizdegi sanitarlyq-epidemiologiialyq jaǵdai týraly densaýlyq saqtaý ministri Eljan Birtanov, Nur-Sultan men Almaty qalalarynda biznes sýbektileri qyzmetiniń jekelegen túrlerin qaita bastaý máselesi týraly Premer-Ministrdiń orynbasary Eraly Toǵjanov, sondai-aq ákimder Altai Kólginov pen Baqytjan Saǵyntaev baiandady.
Jedeldikti jáne azamattardyń qaýipsizdigin qamtamasyz etý maqsatynda Memlekettik komissiia Eńbek jáne halyqty áleýmettik qorǵaý ministrligi engizgen azyq-túlik jáne turmystyq jiyntyqtardy zattai emes, jeke tulǵalardyń shotyna aqshalai qarajatty aýdarý arqyly berý týraly usynysty maquldady.
«Óńirlerdiń ákimdikteri usynylǵan tetikke sáikes, kómekti alýshylarǵa aqshalai qarajattyń ýaqtyly aýdarylýyn qamtamasyz etýi kerek. Karta shottary bolmaǵan jaǵdaida nemese kómek alýshylardyń jasyna ne múgedektigine bailanysty kelýge múmkindigi bolmasa, sanitarlyq talaptardy saqtai otyryp, azyq-túlik jiyntyǵyn úige jetkizýdi qamtamasyz etý qajet», — dedi A. Mamin.
