Úkimettiń búgingi otyrysynda QR Premer-Ministri Baqytjan Saǵyntaev quziretti memlekettik organdarǵa muǵalimderdiń jalaqysyn kóterýdi tapsyrdy, dep xabarlaidy Ult.kz tilshisi QazAqparat agenttigine silteme jasap.
"2018 jyldyń 1 qańtarynan bastap bilim berýdiń jańartylǵan mazmunyna kóshken 1-shi, 2-shi, 5-shi jáne 7-shi synyp ustazdarynyń laýazymdyq jalaqysyn 30 protsentke kóbeitý kerek. Al 1 qyrkúiekten bastap atalǵan sharalar 3-shi, 6-shi jáne 8-shi synyptar boiynsha atqarylýy shart", - dedi B.Saǵyntaev.
Úkimet basshysynyń aitýynsha, aǵymdaǵy jylda ulttyq biliktilik testi engiziledi. Sonyń aiasynda muǵalimderdiń kategoriialary anyqtalady. Jańa júie boiynsha óz kategoriiasyn rastaǵan ustazdardyń jalaqysy 30 protsentten 50 protsentke deiin ósedi. Atalǵan jumysqa QR Bilim jáne ǵylym ministrligi, QR Eńbek jáne áleýmettik damý ministrligi, QR Ulttyq ekonomika ministrligi men QR Qarjy ministrligi jaýapty.
Aita keteiik, biylǵy Joldaýda QR Prezidenti Nursultan Nazarbaev muǵalimderdiń jalaqysyn kóterýdi tapsyrdy. "Jańartylǵan mazmun degenimiz - halyqaralyq standarttarǵa sai keletin jáne Nazarbaev ziiatkerlik mektepterinde beiimdelýden ótken zamanaýi oqý baǵdarlamalary. Bular bizdiń balalarymyzǵa qajetti fýnktsionaldyq saýattylyq pen syni turǵydan oilaý qabiletin darytady.
Sonymen qatar 2018 jyly kategoriialar arasyndaǵy alshaqtyqty arttyryp, muǵalimder úshin biliktilik deńgeiin eskeretin kategoriialardyń jańa kestesin engizýdi tapsyramyn. Kategoriialardy búkil álemde qoldanylyp júrgen ulttyq biliktilik test arqyly berý kerek. Bul pedagogtardy ózderin udaiy jetildirýge yntalandyratyn bolady. Nátijesinde, muǵalimderdiń jalaqysy biliktiliginiń rastalýyna bailanysty tutastai alǵanda 30 protsentten 50 protsentke deiin ósedi. Bul úshin biyl qosymsha 67 milliard teńge bólý qajet", - delingen Joldaýda.
