Qazaqstanǵa shet elden kelgen adamnyń barlyǵy oqshaýlandyrylady. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy "Ult aqparat".
«Shetelden kelgen barlyq tulǵalardy oqshaýlaý jáne saraptama alý engizilgendigin taǵy da qaitalaǵym keledi. QR bas sanitarlyq dárigeriniń qaýlysymen kóshelerdi, jaiaý júrginshiler jolyn, aialdamalardy, saýda oiyn-saýyq ortalyqtaryn, dini maqsattaǵy, kommýnaldyq sharýashylyq nysandaryn, saparjailardy, áýejailardy, bazarlardy, azyq-túlik ónerkásibi, qoǵamdyq tamaqtaný nysandaryn zararsyzdandyrý engizildi», - dedi ministr.
Onyń dereginshe, elimizdiń Densaýlyq saqtaý ministrligi infektsiialyq statsionarlarda 2 230 tósek ornyn, 6 900 tósek-orynǵa arnalǵan 70 provizorlyq statsionardy jáne 14 myń tósek-orynǵa arnalǵan 89 karantindik statsionardy bólip otyr.
«EAEO-men ishki shekaralarǵa sanitarlyq-epidemiologiialyq qyzmettiń 152 mamany is-saparǵa jiberildi», - dedi Dáýren Abaev.
