Qazaqstandaǵy kedeiler sanyn naqty anyqtap alýymyz qajet. Mundai pikirdi búgin Senattaǵy Elbasynyń azamattardy áleýmettik qorǵaý boiynsha bergen tapsyrmalarynyń oryndalýy qaralǵan Úkimet saǵatynda senator Murat Baqtiiaruly bildirdi, dep habarlaidy QazAqparat tilshisi.
"Bizdiń elimizdegi kedeilerdiń sany qansha? Jalpy kedeishilikti ólsheý tetikteri qandai? Eń tómengi kúnkóris deńgeii qazirgi naryqtyq jaǵdaiǵa sai kele me? Ony esepteý sharttary durys pa? Bul - úlken jáne eń negizgi másele. Kórshi Resei eli ózindegi kedeilerdiń sanyn 18 mln dep anyq kórsetip, ony tómendetýdiń joldaryn jasap jatyr. Biz de kedeilerimizdiń sanyn naqty anyqtap alýymyz qajet", - dedi M.Baqtiiaruly.
Senatordyń dereginshe, elimizdegi kúnkóristiń eń tómengi deńgeii 2019 jyly 29 698 teńge boldy. Al Eýraziialyq ekonomikalyq odaqqa kiretin Reseide 64 800 teńge, Belarýsta 38 400 teńge, Armeniiada 43 300 teńge, Qyrǵyzstanda 25 876 teńgeni quraidy.
"Elimizdegi eń tómengi kúnkóris shegi kúnine 990 teńge kiris kiretinder sanalsa, BUU standarty boiynsha eń tómengi kúnkóris sheginiń kólemi 5 dollar, iaǵni, 1875 teńge bolyp eseptelinedi. Sondyqtan Úkimet birinshiden eń tómengi kúnkóris shegi kólemin qazirgi shynaiy turmysqa, ómir sapasyna beiimdep, oǵan jumsalatyn qarjy kózderin izdese deimiz", - dedi ol.
Sondai-aq ol zamattyq qyzmetkerlerdiń jalaqysyn 30 paiyzǵa kóbeitý bul óte der kezinde jasalyp otyrǵanyn atap ótti.
"Degenmen laýazymdyq jalaqyny esepteý kezinde qoldanylatyn bazalyq laýazymdyq jalaqy deńgeii tómen qalyp otyr. Mundai jaǵdaida azamattyq qyzmetkerlerdiń kóbisi memlekettik turǵyn úi baǵdarlamasyna qatysa almaidy. Jalpy, keleshekte bazalyq laýazymdyq jalaqyny zańmen bekitilgen ailyq jalaqynyń eń tómengi kólemimen almastyrý qarastyrylsa deimiz", - dedi senator.
