Búgin QR Úkimeti eldi áleýmettik-ekonomikalyq damytýdyń naqtylanǵan boljamyn maquldady, dep habarlaidy "Ult aqparat".
«Qazaqstan ekonomikasynyń jyl basynan beri ósýi boiynsha shuǵyl derekterdi jáne álemdik taýar naryǵyndaǵy jaǵdaidy, sondai-aq álemdik ekonomikanyń ósý boljamdaryn esepke ala otyryp, Úkimet Áleýmettik-ekonomikalyq damytýdyń 2021 jylǵa arnalǵan boljamynyń kórsetkishteri men indikatorlaryn qaita qarady. Mysaly, 2021 jyly jalpy ishki ónimniń naqty ósýi – 3,1 paiyz deńgeiinde, munai baǵasy – bir barrel úshin 50 dollar deńgeiinde, ulttyq valiýta baǵamy bir dollar úshin 425 teńge deńgeiinde boljanyp otyr. Osyǵan bailanysty respýblikalyq biýdjet jobasy Áleýmettik-ekonomikalyq damýdyń naqtylanǵan boljamyn esepke ala otyryp qalyptastyryldy», -dedi Úkimet otyrysynda QR Premer-Ministri Asqar Mamin.
Onyń atap ótýinshe, 2021 jylǵa arnalǵan naqtylanǵan biýdjet shyǵystarynyń negizgi baǵyttary «Nur Otan» partiiasynyń baǵdarlamasyn jáne Memleket basshysynyń 2020 jylǵy 1 qyrkúiektegi Qazaqstan halqyna Joldaýyn iske asyrýdy qamtamasyz etý bolyp sanalady.
«Sonymen qatar bul shyǵystar pandemiiamen kúres sharalaryn qarjylandyrýǵa jáne densaýlyq saqtaý júiesin jańǵyrtýǵa, sondai-aq ekonomikanyń naqty sektoryn yntalandyrýǵa baǵyttalǵan. Eger suraqtar bolmasa, usynylǵan Eldi áleýmettik-ekonomikalyq damytýdyń naqtylanǵan boljamyn maquldaýdy jáne biýdjetti naqtylaý boiynsha tiisti zań jobasyna jáne tiisti Jarlyq jobasyna daýys berýdi usynamyn», - dedi ol.
Úkimet bul usynysty biraýyzdan qoldap daýys berdi.
