Búgin Úkimet otyrysynda QR Bilim jáne ǵylym ministri Erlan Saǵadiev stýdenttik jataqxanalardyń qurylysy boiynsha esep berdi. Atalǵan mindet Prezidenttiń «Bes áleýmettik bastamasyna» kiredi, dep habarlaidy QazAqparat tilshisi.
Ministrdiń aitýynsha, osy ýaqytqa deiin barlyq normativtik aktiler qabyldandy. Qarjylandyrý máselesi de retteldi. Oǵan sáikes, joǵary oqý oryndary tapsyrys berip, jataqxanalardy jekemenshik kompaniialarǵa saldyrtady. Al ministrlik árbir orynǵa sýbsidiia berý arqyly qurylystyń shyǵyndaryn birtindep qaitarady.
«Keshe eń alǵashqy jeti joǵary oqý orny jáne eki jekemenshik kompaniia arasynda kelisimsharttar rásimdeldi. Sonyń aiasynda tórt myńǵa jýyq jatyn orny bar jataqxanalar salý jumystary bastalyp ketti. Jalpy, 10 jyldyń ishinde 75 myń orynǵa arnalǵan jataqxanalar salynady. Oǵan respýblikalyq biýdjetten 153 milliard teńge bólinedi», - dedi E.Saǵadiev.
Osy oraida Úkimet basshysy Baqytjan Saǵyntaev jyl sońyna deiin qansha jataqxana salynatynyn surady.
Vedomstvo basshysynyń sózine qaraǵanda, aǵymdaǵy jyldyń aiaǵyna deiin 2 jataqxana paidalanýǵa beriledi. Al jatyn oryndardyń jalpy sany 1 500 bolady. Degenmen, Premer-Ministr osy saladaǵy jumystyń tym baiaý júrgizilip jatqanyn atap ótti. Negizgi sebep - qarjynyń tapshylyǵy. Máselen, kelesi jylǵa 5 myń orynǵa arnalǵan jataqxanalarǵa ǵana qarjy qarastyrylyp otyr. Osyǵan bailanysty Úkimet basshysy qarjylandyrý kólemin arttyrýdy tapsyrdy.
