QR Premer-Ministri Asqar Mamin Qostanai oblysyna jumys saparymen keldi, dep habarlaidy "Ult aqparat".
Úkimet basshysy Qostanai aýdanynyń Zarechnyi kentindegi Severnyi shaǵyn aýdanyndaǵy turǵyn úi qurylysymen tanysty. Turǵyn úiler «Nurly jer» baǵdarlamasy aiasynda salynyp jatyr. Baspana qurylysymen «Arvis», «Aqjan jáne biz», «Montajnik OA-k» JShS ainalysýda.
Jalpy, bul jańa yqsham aýdanda 279 jeke turǵyn úi bar. Injenerlik infraqurylym tartylǵan. 430 orynǵa shaqtalǵan memlekettik tilde bilim beretin orta mektep turǵyzyldy. Taiaý keleshekte bul aýdanda memlekettik-jekemenshik áriptestik aiasynda 320 oryndyq balabaqsha, sporttyq mekemeler, saýda nysandary jáne ákimshilik ǵimarattar paida bolady.
A.Mamin Qostanai qalasyndaǵy Indýstriialyq aimaqta boldy. Taiaýda Qazaqstan men Reseidiń úkimet basshylary birlesken jobalardy júzege asyrý jóninde birqatar kelisimge qol qoiǵany málim. Sonyń ishinde Qostanaida «Kirovets» traktorlaryn shyǵarý bastamasy – irgeli jobalardyń biri. Aldaǵy qazan aiynda iske qosylýy tiis jańa jeli boiynda jylyna 500-den 700-ge deiin alyp traktor qurastyrylady.
A. Maminge tanystyrylǵan Indýstriialyq aimaqtaǵy ekinshi iri joba – «KamAZ» kóliginiń qural-jabdyqtaryn shyǵarý. Bul úsh kezeńnen turady. Alǵashqyda jetekshi beldemniń qozǵalys berilgishi, odan keiin tejegish qalyby, oryndyq, qajetti rezeńke, plastik buiymdary bizde óndiriletin bolady.
Úkimet basshysy sapar barysynda óńirdiń birqatar júie quraýshy kásiporyndaryn, áleýmettik infraqurylym nysandaryn aralap, sondai-aq aýyl sharýashylyǵy taýar óndirýshilerimen keńes ótkizedi.
