QR Úkimet basshysy Baqytjan Saǵyntaev jaýapty vedomstvolarǵa halyqty jumyspen qamtý jumystaryna monitoring júrgizýdi júktedi, dep habarlaidy QazAqparat tilshisi.
«Jalpy, baǵdarlamanyń (nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan memlekettik baǵdarlamasy) josparly kórsetkishteri jaman emes. Jyldyń sońyna deiin áli eki ai bar. Qurmetti ákimder, ózderińizdiń baiandamalaryńyzda aityp otyrǵandai, óńirlerde jumysty ary qarai jyldamdatyp, jyldyń sońynda josparlanǵan kórsetkishtiń bárine qol jetkizýimiz qajet», - dedi Baqytjan Saǵyntaev búgingi Úkimet otyrysynda.
Úkimet basshysy budan basqa Eńbek jáne halyqty áleýmettik qorǵaý ministrligi, UEM, AShM-men birlesip, nysanaly toptardy, atap aitqanda jumyssyzdar men ózin-ózi jumyspen qamtyp otyrǵan adamdardyń tabysyn arttyrý úshin nátijeli jumyspen qamtýǵa tartý boiynsha qabyldap jatqan sharalardyń áserine monitoring júrgizý júiesin jolǵa qoiý kerektigin eskertti.
«Sol sebepten Mádina Erasylqyzy, «Atameken» palatasymen jáne óńirlermen birge «Bastaý-biznes» jobasy boiynsha oqýyn aiaqtaǵan adamdarǵa mikronesie berý boiynsha máseleni tolyq sheshýimiz qajet. Bir jyl boiy ol jaǵyn aityp kele jatyrmyz. Kelesi jyly bir baǵytqa kóshýimiz qajet», - dedi Úkimet basshysy.
Premer-ministr sondai-aq oqyǵandardyń 33 paiyzyn jumyspen qamtylý kórsetkishi tómen ekenin aityp ótti.
«Bul - basa nazar aýdaratyn másele. Óńirlerdiń ózindik jobasy bar. Bul bizdiń joba men eki arada biraz arbitraj bolyp tur. Sol sebepten aldaǵy ýaqytta osyndai jaǵdailar bolmaý úshin qaraý kerek. Eger óńirlik baǵdarlama keibir jaǵdailary boiynsha, mysaly nesieni protsentpen berýi jeńildetilip, suranystyń bári osy baǵdarlamaǵa keletin bolsa, onda sol óńirlerge qarjynyń bólinýi basqasha sheshilýi kerek. Ony qosymsha taǵy talqyǵa salýǵa tiispiz. Kelesi jyly mundai arbitraj bolýy durys emes», - dedi Premer-ministr.
Úkimet basshysy ózektendirilgen baǵdarlamanyń tiimdiligi turǵyndardyń tabysynyń ósýine qarai da baǵalanýy tiis ekenin málim etti.
«Eńbek jáne nátijeli jumyspen qamtýdyń jáne jappai kásipkerlikterdi damytýdyń memlekettik baǵdarlamasynyń jobasyn, oǵan engizilgen ózgeristerdi eskere otyryp, maquldaýǵa bolady. Elbasymen kezikkennen memlekettik baǵdarlamanyń jobasy Úkimet músheleriniń daýys berýine engiziletin bolsyn. Erbolat Asqarbekuly (Dosaev), bul sharýa sizdiń baqylaýyńyzda», - dedi Úkimet basshysy.
Eske sala ketsek, buǵan deiin Eńbek jáne halyqty áleýmettik qorǵaý ministri Mádina Ábilqasymova nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan memlekettik baǵdarlamasy qalai júzege asyrylyp jatqanyn baiandaǵan edi.
