Premer-ministr Baqytjan Saǵyntaev Investitsiialar jáne damý ministri Jeńis Qasymbekke energiia tutynýdy azaitý algoritmderin daiyndaýdy tapsyrdy, dep habarlaidy QazAqparat tilshisi.
«Elimizdegi energiia únemdeý tapsyrmasyn Elbasy birneshe ret atap ótken bolatyn. Bul rette Investitsiialar jáne damý ministrligi ónimniń ár birligine (...) shaqqanda energiia tutynýdy azaitý algoritmderin daiyndaý qajet. Jalpy, ónerkásip salalarynyń energiiany kóp qajet etýin azaitý jóninde bizde tek ortaq derekter ǵana bar», - dedi Baqytjan Saǵyntaev búgingi Úkimet otyrysynda.
Premer-ministr «Samuryq Qazyna» aktsionerlik qoǵamy basqarmasynyń tóraǵasy Ahmetjan Esimovke de osy máselege nazar aýdarý kerektigin atap ótti.
«Ahmetjan Smaǵululy, sizge de ótinish, «Samuryq-Qazyna» quramyndaǵy kompaniialardyń energiia tutynýyn jóndeý jónindegi jumystardy durys jolǵa qoiý kerek. Jeńis Mahmuduly, sizge osy naqty algoritmderdi ázirleýdi tapsyramyn. Óńir ákimdikteri investorlarmen jáne energiiany kóp jumsaityn kásiporyndarmen jumysty jandandyrýy qajet. Onyń ishinde memlekettik-jekeshelik áriptestik jobalaryn iske asyrý jáne energiiany únemdeýdi nasihattaý jumysyna kóńil bólinýi tiis», - dedi ol.
Baqytjan Saǵyntaev MJÁ boiynsha naqty jumys Pavlodar, Qyzylorda jáne Atyraý oblystarynda ǵana júrip jatqanyn eske saldy.
«Al energiia únemdeý bólimderi Pavlodar men Qostanai oblystarynda ǵana bar. Basqa óńirlerde jumys joq. Iaǵni, aityp otyrǵan algoritm joqtyń qasy. Ózgeris bolyp jatyr ma, joq pa - qadaǵalaityn múmkindik joq. Sondyqtan, qurmetti ákimder osy máselege kóńil bólýdi suraimyn», - dep túidi Úkimet basshysy.
Eske sala ketsek, buǵan deiin Investitsiialar jáne damý ministri Jeńis Qasymbek energiiany únemdeý baǵytynda Úkimet basshysynan jumysty kúsheitý jóninde tapsyrma berýdi suraǵan bolatyn.
