Premer-ministr Asqar Mamin «Astana» Halyqaralyq qarjy ortalyǵynyń jumysyn jetildirýdi tapsyrdy, dep habarlaidy "Ult aqparat".
«Astana» Halyqaralyq qarjy ortalyǵy Elbasy Nursultan Ábishuly Nazarbaevtyń tikelei bastamasymen qurylǵan. Qarjy ortalyǵy biznesti damytýda, sheteldik investitsiiamen qamtyp, kapitalǵa qol jetkizýde mańyzdy ról atqarýy tiis. Qairat Kelimbetov osy baǵytta úlken jumys júrgizilip jatqanyn baiandady. Barlyq memlekettik organdar men ulttyq kompaniialar osy alańdy tiimdi paidalanyp, onyń qalyptasýy men damýyna yqpal etýi kerek», - dedi Premer-ministr Úkimet otyrysynda.
Asqar Maminniń aitýynsha, qazirgi kezde Qarjy ortalyǵy halyqaralyq joǵary deńgeige shyqqan.
«Qarjy qurylymdarymen úzdik tájiribesi eskerilgen. Erekshe rejimmen jumys isteidi. Jalpy, ortalyqtyń jumysynda biregei mehanizm jasalǵan. Osy rette Qairat Nematuly bekitilgen Jol kartasy boiynsha jumysty jalǵastyryp, Qarjy ortalyǵynyń jumysyn jetildirý qajet. «100 naqty qadam: Ult jospary» aiasynda 2015 jyly «Astana» HQO týraly arnaiy konstitýtsiialyq zań qabyldanyp, onyń maqsaty men mindetteri, printsipteri anyqtaldy. Osy konstitýtsiialyq zańǵa búgin usynylyp otyrǵan túzetýler qarjy ortalyǵynyń eldiń negizgi qarjylyq platformasy retinde jyldam qalyptasyp, damýyna múmkindik beredi. Sondyqtan, suraqtaryńyz bolmasa, tiisti qaýly jobasyna daýys berýdi usynamyn», - dedi ol.
Úkimet músheleriniń bári de biraýyzdan qaýly jobasynyń ázirlenýin qoldap, daýys berdi.
«Sheshim qabyldandy. Qarjy ministrligi «Astana» HQO-men birlesip, osy zań jobasyn Parlamentte sapaly túrde pysyqtaýdy qamtamasyz etýi qajet. Salyq kodeksine qajetti ózgeristerdi engizýdi tapsyramyn. Barlyq engizilgen ózgerister 2020 jyly 1 qańtardan bastap jumys istei bastaýy kerek», - dedi Asqar Mamin.
