Úkimettiń búgingi otyrysynda Premer-Ministr Baqytjan Saǵyntaev qazaqstandyq taýarlar men qyzmetterdi kóptep satyp alyp, qazaqstandyq qamtýdyń kólemin arttyrýdy tapsyrdy, dep xabarlaidy Ult.kz tilshisi QazAqparat agenttigine silteme jasap.
"Memleket basshysy importty otandyq taýarlarmen barynsha almastyrý mindetin qoiyp otyr. Statistikalyq málimetterge sáikes, 2015 jylmen salystyrǵanda qazaqstandyq qamtýdyń kólemi 8 paiyzǵa azaidy. Bul neni kórsetedi? Demek, osy saladaǵy jumys báseńdep ketti", - deidi Saǵyntaev. Onyń aitýynsha, qazirgi kezde jihaz ben jeńil ónerkásip ónimderi boiynsha qazaqstandyq qamtýdy ulǵaitý jumysy qolǵa alynǵan. Alaida osymen shektelmeý kerek. Bul rette Úkimet basshysy aǵymdaǵy aidyń aiaǵyna deii basqa da salalardy zerdelep, buǵan deingi mexanizmdi qoldaný qajettigin jetkizdi. "Budan bólek, qarjy ministrligi memlekettik satyp alýlar kezinde otandyq ónimderdi paidalaný máselesin jiti baqylaýda ustaýy tiis. Eger bireý ol talaptardy buzatyn bolsa, qatań sharalardy qoldaný qajet", - dep atap kórsetti Premer-Ministr.
Osy oraida Úkimet basshysy tabiǵi monopoliialar salasyndaǵy kompaniialardyń otandyq gazdy, elektr energiiasyn jáne taǵy basqa shikizatty qazaqstandyq ónim dep kórsetkenderine kóńil bólmeý kerek dep sanaidy. Qazaqstandyq qamtý salasynda naqty taýarlar eskerilýi shart. "Biz kerek kezde iri kompaiialarǵa qoldaý jasaimyz. Demek, olardan da bir qaitarym bolýy qajet. Ásirese, «Arselor Mittaldyń» tarapynan ondai nemqurailyq qatty baiqalady. Úkimetke ylǵi keledi de, preferentsiia alyp ketedi. Ózderi bolsa, qajetti zattardy syrttan satyp alady. Oǵan eshbir daýa joq. Onyń dál janynda - tosqaýyldyń arǵy jaǵynda bir zaýyt bar. Biraq olardyń ónimin almai, shetelden alyp keledi", - deidi Saǵyntaev. Osyǵan bailanysty ol barlyq kompaniia basshylaryn jinap, arnaiy keńes ótkizýge tapsyrma berdi.
Aita keteiik, Premer-Ministr bir aptanyń ishinde "Samuryq-Qazyna" qorynyń satyp alýlaryna qatysty biryńǵai erejelerdi de ázirleýdi tapsyrdy.
