Azamattardyń qaýipsizdigin qamtamasyz etý úshin kei óńirlerde belgili bir shekteýler áli de qoldanylyp otyr. Bul týraly búgin Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Epidemiologiialyq jaǵdai baqylaýda. Azamattardyń qaýipsizdigin qamtamasyz etý úshin keibir óńirlerde belgili bir shekteýler áli de qoldanylyp otyr. Biylǵy qańtar aiynyń qorytyndysy boiynsha 7 negizgi kórsetkishtiń ishinde 5-ýi boiynsha segiz óńirde áleýmettik-ekonomikalyq damýdyń ósýi baiqalýda. Olar – Aqmola, Aqtóbe, Almaty, Jambyl, Qostanai oblystary men Nur-Sultan, Almaty jáne Shymkent qalalary», - dedi Asqar Mamin.
Úkimet basshysy bes óńirde 4 kórsetkish boiynsha oń dinamika baiqalatyndyǵyn aitty.
«Olar – Qaraǵandy, Qyzylorda, Pavlodar, Túrkistan, Shyǵys Qazaqstan oblystary. Soltústik Qazaqstan, Atyraý, Batys Qazaqstan jáne Mańǵystaý oblystarynyń qol jetkizgen kórsetkishteri tómen», - dedi Premer-Ministr.
