Premer-Ministr Baqytjan Saǵyntaevtyń tóraǵalyǵymen ótken Úkimet otyrysynda Úkimet músheleri biraýyzdan Qazaqstannyń 2025 jylǵa deiingi strategiialyq damý josparyn qoldap, Memleket basshysynyń qaraýyna jiberdi, dep habarlaidy "Ult aqparat".
Ulttyq ekonomika ministri Timýr Súleimenovtyń aitýynsha, Strategiialyq jospardyń basty maqsaty — 2025 jylǵa deiin sapaly ári tabysty ekonomika ósimin qamtamasyz etý, EYDU-ǵa múshe eldermen salystyrýǵa keletin ómir súrý deńgeiine jetý. Jobaǵa sáikes, jylyna kem degende 4,5-5% deńgeiinde ekonomika ósimine qol jetkizý josparlanyp otyr, bul Qazaqstanǵa jan basyna shaqqandaǵy JIÓ ósim deńgeiin 2025 jylǵa qarai 46 100 $ (SQT boiynsha) deiin qamtamasyz etýge múmkindik beredi. T. Súleimenovtyń aitýynsha, qujat jobasy túrli deńgeide talqylaýdyń tórt kezeńinen ótti, sonyń ishinde halyqaralyq uiymdardyń saraptamalyq baǵalaýy da bar. Máseleni qaraý qorytyndysy boiynsha, Strategiialyq jospar jobasyn QR Úkimetiniń músheleri biraýyzdan qoldap, Memleket basshysynyń qaraýyna jiberdi. Baqytjan Saǵyntaev bunyń óte mańyzdy qujat ekenin atap ótti. Joba Astana men Almatynyń túrli alańdarynda qaraldy. Sońǵy talqylaý otandyq sarapshylardyń qatysýymen keshe ótkizildi. «Memleket basshysynyń biylǵy Joldaýyndaǵy tapsyrmasyna sáikes, ekonomikalyq ósimniń jańa modelin qurýdy jáne halyqtyń ál-aýqatyn jaqsartýdy kózdeitin qujat ázirlendi. Atalǵan qujat elimizdiń negizgi strategiialyq qujaty – «Qazaqstan-2050»-di iske asyrýǵa baǵyttalǵan. Maqsat – 30 ozyq damyǵan el qataryna qosylý», — dedi B. Saǵyntaev. Osyǵan orai, jurtshylyqqa durys ári túsinikti tilmen atalǵan strategiialyq qujattyń mánin túsindirý qajet. Baqytjan Saǵyntaev ulttyq ekonomika ministrligine aqparat jáne kommýnikatsiialar ministrligimen, ózge de múddeli memlekettik organdarmen birlesip tiisti jumysty qolǵa alýdy tapsyrdy.
Úkimet 2025 jylǵa deiingi strategiialyq damý josparyn qoldady
