Koronavirýs infektsiiasynyń epitsentri sanalatyn Qytaidyń Ýhan qalasynda oqý bitiretin joǵary synyptardy qospaǵanda oqýshylardyń bárine oqý qaita bastalady. Bul týraly Sinhýa agenttigi habarlady.
10 shildeden bastap biyl oqýdy bitirmeitin joǵary dárejedegi orta mektepterdiń oqýshylary qaityp oralady. Olarmen birge kásibi-tehnikalyq ýchilishede bilim alýshylar da qaita oqýyn jalǵastyrady. Olardyń jazǵy demalystary 31 shildede bastalady.
Tómengi dárejedegi orta mektepterdiń oqý bitirmeitin synyptaryndaǵy oqýshylar ózderiniń onlain-sabaqtaryn 5 shildede aiaqtaidy. 10 tamyz kúni muǵalimder men oqýshylar 30 tamyzǵa deiin jalǵasatyn sabaqqa kirisedi. Al bastaýysh mektepter men balabaqshalardyń jazǵy demalysy 5 shildede bastalady.
Joǵary oqý oryndarynyń oqý bitirmeitin stýdentteri qajettilik týyndamaǵan jaǵdaida kampýsqa qaityp kelýge mindetti emes. Olar ótinim berip, qaityp kelgisi kelse JOO-larynan ruqsat alýy tiis.
Mektepten tys oqý uiymdary epidemiiany baqylaý jáne aldyn alý boiynsha tiisti talaptardy oryndaǵan jaǵdaida sabaqtaryn jandandyra alady. Bul týraly Ýhan qalasynyń bilim basqarmasy bastyǵynyń orynbasary Sia Shýnin habarlady.
Hýbei provintsiiasy 13 maýsymnan bastap qoǵamdyq densaýlyq saqtaý salasynda tótenshe jaǵdailarǵa qarai shuǵyl áreket etý deńgeiin ekinshiden úshinshige túsirdi. Dúisenbidegi jaǵdai boiynsha provintsiiada aýrý belgisi joq bir adamnyń meditsinalyq baqylaýda jatqany habarlanǵan.
