Úkimettik emes uiymdarǵa grant bólýdi arnaiy komissiia sheshedi. Bul týraly QR Aqparat jáne qoǵamdyq damý ministrligi Azamattyq qoǵam isteri komitetiniń tóraǵasy Madiiar Qojahmet aitty, dep habarlaidy QazAqparat.
«Elimizde 22 myń úkimettik emes uiym jumys isteidi. Eger granttardy bólýge arnalǵan sońǵy konkýrstyń nátijeleri jaiynda aitar bolsaq, onda biz 50 jobany júzege asyrýǵa shamamen bir mlrd teńge biýdjet qarajatyn bóldik. Konkýrsqa 328 uiym qatysty. Onyń ishinde elý úkimettik emes uiym jeńimpaz dep tanyldy. Olardyń qatarynda ótken jyly, eki jyl buryn tirkelgen uiymdar bar. Sany jaǵynan aitar bolsaq, jańa jáne baiaǵydan jumys istep kele jatqan uiymdar arasyndaǵy tepe-teńdik saqtalady. Keibir jobalardy bul salada 10 jyl jumys istep kele jatqan, al keibirin bul ispen ainalysa bastaǵan uiymdar júzege asyrady. Konkýrsqa jeńiske jete almai qalǵan ózge uiymdardyń keibiri nátijemen kelispei, baiqaýdyń ashyq ótpegendigin aitady. Memleket barlyq úkimettik emes uiymdardy qarjylandyrýdy maqsat etpegendigin atap ótkim keledi. Sondyqtan tapsyrys konkýrsta óziniń daiyndyǵyn ári nátijeliligin kórsete alǵan uiymdar ǵana aldy. Qarjy bólý týraly sheshimdi men emes arnaýly komissiia shyǵarady», – dedi ol Ortalyq kommýnikatsiialar qyzmetindegi baspasóz máslihatynda.
Madiiar Qojahmettiń atap ótýinshe, granttyq jobalardy júzege asyrý úshin Azamattyq bastamalardy qoldaý ortalyǵy qurylǵan. Ol sońǵy bes jyldan astam ýaqyt boiy jumys isteidi.
