ÝEFA-nyń (Eýropa fýtbol qaýymdastyqtary odaǵy) burynǵy prezidenti Mishel Platini 2022 jylǵy Álem chempionatyn ótkizetin eldi anyqtaý úshin ótken sailaýda sybailas jemqorlyqqa jol berdi degen kúdikpen seisenbi kúni qamaýǵa alyndy, dep habarlaidy The Telegraph.
Basylymynyń habarlaýynsha, Frantsiianyń Nanterre qalasynyń sottyq politsiiasy búgin tańerteń Platinidi jemqorlyqqa qarsy basqarmaǵa jetkizgen. Ony fýtboldan 2022 jyly álem chempionatyn Katarda ótkizý mártebesin berý kezinde para aldy degen aiyp taǵylǵan. Sonymen qatar, osy is boiynsha Klod Gean da aiyptalýda. Ol Nikolia Sarkozi prezident bolyp turǵanda Eliseisk saraiynyń bas hatshysy qyzmetin atqarǵan. Alaida ol bostandyqta júr.
Mishel Platini 2007-2015 jyldar aralyǵynda Eýropa fýtbol qaýymdastyqtary odaǵyn basqarǵan. Bul laýazymyn FIFA ony segiz jylǵa fýtboldan shettetken soń tapsyrǵan.
Onyń qamaýǵa alynýyna - 2011 jyly FIFA-nyń esep shotynan Platinige 2 mln eýroǵa jýyq aqshanyń aýdarylǵany sebep. Aqshany 1998-2015 jyldar aralyǵynda FIFA-ny basqarǵan Iozef Blatter aýdarǵan. Osy oqiǵaǵa bailanysty Blatter de fýtboldan shettetilgen bolatyn.
Artynsha Platini apelliatsiia bergen soń shettetilý merzimi qysqartylyp, 2019 jyldyń qazan aiynda aiaqtalýy tiis edi.
Eske sala keteiik, fýtboldan 2022 jylǵy Álem chempionatyn ótkizý úshin kúreste Qatar 2010 jyly AQSh, Aýstraliia, Ońtústik Koreia men Japoniiany artta qaldyrǵan bolatyn. Keiin fýtbol sheneýnikteri ótinim berýde daýystardy satyp aldy dep aiyptalǵan. FIFA táýelsiz komissiiaǵa bul is boiynsha tergeý júrgizýdi tapsyrǵan, alaida satyp alý aiǵaǵy anyqtalmady.
Platini de, Blatter de ózderine taǵylǵan aiyptyń bir de birin ázirge moiyndaǵan joq.
